BOBONARU, 26 Setembru 2025 (TATOLI)-Ministériu Saúde (MS) sosializa Papél no Responsablidade Voluntáriu Saúde Komunitária (VSK) ba autoridade lokál sira iha munisípiu Bobonaru hodi bele apoia implementasaun Programa Integradu Saúde (PIS).
Atividade ne’e halo atu funsiona hikas Ekipa Voluntáriu Saúde iha kada suku hodi apoia ekipa saúde hodi hakbesik liután programa ne’e ba iha baze.
“Ai-moruk Ministériu Saúde iha, matenek kura ema Ministériu Saúde iha, más povu la’ós Ministeriu Saúde nian, [maibé] komunidade ne’e autoridade lokál sira-nia. mi lori ami-nia ai-moruk bá, ami lori ami-nia matenek ba ita-boot sira-nia fatin, maibé kuandu laiha partisipasaun másima husi ita-nia komunidade ne’e mós ladún di’ak”, Xefe Departamentu Informasaun iha MS, Nislita Vital, hateteten iha salaun Sagrado Coração de Jesus Maliana.
Nia dehan Governu hili Bobonaru no munisípiu haat seluk sai pilotu ba implementasaun PIS atu hasa’e liután prestaun saúde ba komunidade iha baze, liuliu sira ne’ebé iha área rurál.
Diretór Servisu Munisipál Saúde, Autoridade Munisípiu Bobonaru, Gíl Bernardo Vicente, husu ba líder komunitáriu sira atu apoia no reforsa programa, nune’e bele lori moris saudavel ba komunidade. “Ita-boot sira mak hatene liu ema ne’ebé atu sai ain-liman ba pesoál saúde sira atu implementa programa ne’e iha baze”, katak
PIS iha foku importante atu sai hanesan ponte ba lakuna entre Diresaun Saúde no programa vertikál oioin. Inisiativa ida-ne’e hasa’e koordenasaun iha no entre departementu, nivel atendimentu saúde, programa servisu, no importante liu entre formulasaun polítika no implementasaun prátika.
Polítika Programa Saúde Integradu ida-ne’e aprezenta modelu kompreensivu ba integrasaun iha sistema saúde nian laran iha nivel importante lima tomak, inklui área servisu saúde tomak no ninia sistema suportivu, ne’ebé hanaran “Modelu Integrasaun Dala-Lima”.
Governu kontinua ho nia kompromisu atu haforsa sistema saúde no kondús ba dalan atinjimentu Kobertura Saúde Universál, liuhusi asesu razoavel ba servisu saúde ho kualidade ne’ebé integradu, seguru, ho sentru iha ema no kobre komponentu oioin atu mantein atendimentu durante ema ida nian moris tomak.
Aleinde ne’e, hadi’a saúde populasaun nian iha territóriu tomak presiza aproximasaun integradu ida atu alevia área relasionadu-saúde ne’ebé kontribui maka’as ba karga moras iha Timor-Leste.
Notisía relevante: Prevene Raiva, MS halo promosaun edukasaun saúde ba komunidade iha Bobonaru
Jornalista: Sergio da Cruz
Editora: Maria Auxiliadora
