DILI, 26 Setembru 2025 (TATOLI) – Bankada parlamentár sira ho konsensu aprova revogasaun Lei Pensaun Mensál Vitalísia ho votu unanimidade iha finál globál, hafoin manifestasaun husi Estudante Universitáriu Timor-Leste (EUTL) iha semana liubá hodi ezije elimina tiha lei ne’e.
Reprezantante portavós EUTL, Natalício Nunes, hateten ida-ne’e nu’udar vitória povu nian. Tanba ne’e mak ezijénsia povu hamriik liuhusi EUTL hodi haree kondisaun ekonomia iha rai-laran no oinsá bele halo poupansa ba osan Estadu.
“Rezultadu ne’ebé ita akompaña iha diskusaun bankada sira hotu a favór halakon totalmente pensaun mensál vitalísia. Primeiru, atu hato’o katak povu mak luta, povu mak determina no povu mak manán. Vitória ida-ne’e ba povu”, nia hateten hafoin asiste diskusaun no votasaun finál globál ba revogasaun lei ne’e iha Parlamentu, ohin.
Hodi dehan EUTL kontinua akompaña hodi hein promulgasaun husi Prezidente Repúblika ba projetu lei ne’e.
Iha fatin hanesan, reprezentante EUTL, José da Costa Soares, agradese povu, kamada sosiál tomak, estudante hamutuk ho EUTL hamriik iha luta ne’e.
Hodi dehan, EUTL nafatin hamriik independente hodi defende justisa sosiál no opta pilár tolu universidade nian ne’ebé iha mak estuda, peskiza no kontrolu sosiál.
EUTL hein katak órgaun lejislativu bele tau atensaun ba ezijénsia seluk hanesan alterasaun ba Lei Manifestasaun no tau atensaun iha diskusaun Orsamentu Jerál Estadu (OJE) ho Governu atu tau prioridade hodi aloka orsa iha setór produtivu.
Lembra katak Parlamentu Nasionál, liuhusi reuniaun plenária estraordináriu, aprova projetu lei númeru 11/VI (3a) Revoga Pensaun Mensál Vitalísia ba Deputadu no Eis-Titulár Órgaun Soberania no Providénsia sira seluk iha finál globál ho votu a favór 62, kontra no abstensaun 0.
Notísia relevante: Parlamentu aprova projetu Lei Revoga Pensaun Mensál Vitalísia iha finál globál
Jornalista: Nelson de Sousa
Editora: Maria Auxiliadora
