MANUFAHI, 28 Setembru 2025 (TATOLI)–Primeiru-Ministru (PM), Kay Rala Xanana Gusmão akompañadu husi Ministru Obra Públika, Samuel Marçal no Vise-Ministru Asuntu Parlamentár, Adérito Hugo da Costa, Domingu ne’e, halo lansamentu fatuk dahuluk ba projetu reabilitasaun estrada Luak bá Betanu, Postu Administrativu Same, Munisípiu Manufahi.
Iha lansamentu ne’e, Primeiru-Ministru, Xanana Gusmão husu ba Manufahi-oan sira hamutuk kontribui ba dezenvolvimentu ne’ebé la’o iha munisípiu refere.
“Iha fatin balun Governu esforsu halo dezenvolvimentu maibé komunidade balun la kontribui halo impedimentu nune’e iha Manufahi ha’u husu koopera malu didi’ak, kaer metin estabilidade, domin ho dame, tanba ida-ne’e mak bele kontribui ba dezenvolvimentu hotu bele la’o,” Xanana Gusmão hateten iha Same.
Nia dehan, kona-ba dezenvolvimentu Governu halo esforsu liuliu iha infraestrutura nian tau mós prioridade iha Planu Estratéjiku Dezenvolvimentu Nasionál (PEND) 2011-2030 ne’e sai hanesan vizaun Governu nian atu la’o tuir.
“Ita ko’alia kona-ba infraestrutura bázika mak hanesan bee-moos, estrada, saúde no edukasaun, ida-ne’e aliserse ka sai fundasaun ida ba infraestrutura bázika, nune’e ita hotu serbisu hamutuk kontribui ba dezenvolvimentu,” nia dehan.
Iha fatin hanesan, Ministru Obra Públika, Samuel Marçal informa konstrusaun estrada husi Luak bá to’o Betanu pakote rua.
Obra referida, nia haktuir, kaer husi kompañia Starking Unipessoal Lda, King Construction Lda, totál orsamentu hamutuk millaun $7 ho totál 17 idakilometru, luan metru neen no durasaun tinan .
Nia esplika ohin halo lansamentu inklui asina kontratu kedas iha povu nia oin, oinsá povu bele sente kedas no tau-matan ba projetu ne’e, tanba ida-ne’e mak Governu nia kompromisu.
Samuel husu povu tomak liuliu Manufahi-oan nafatin hamutuk kontribui ba dezenvolvimentu no labele halo impedimentu ba dezenvolvimentu sira.
Aleinde ne’e, Prezidente Autoridade Munisípiu Manufahi, Luís Tavares hateten povu nia hakarak mak hadi’a infraestrutura sira liuliu estrada tanba ida-ne’e apoiu atividade ekonomia komunidade nian, oinsá fasilita sira lori produtu asesu ba merkadu.
“Governu lori ona dezenvolvimentu ne’e mai. Ami-nia devér mak kria estabilidade no iha responsabilidade oinsá eduka ha’u-nia povu hodi kontribui dezenvolvimentu, katak tenke iha vontade no sakrifísiu prontu oferese rai rohan ruma ba iha dezenvolvimentu Governu sentrál nian,” nia subliña.
Jornalista: Arminda Fonseca
Editór: Xisto Freitas da Piedade
