VIKEKE, 29 Setembru 2025 (TATOLI)—Koordenadór organizasaun internasionál Adventist Development and Relief Agency (ADRA-sigla ingleza) iha Timor-Leste, Alberto Guterres dezafia komunidade Munisípiu Vikeke atu hasa’e produsaun mina nuu tanba ADRA identifika ona kompradór sosa mina nuu ho kuantidade ne’ebé boot.
“Ami halo kontaktu ba kompradór sira atu sosa komunidade Vikeke ninia produtu mina nuu sira, maibé ita-nia produsaun mina ne’ebé ita-nia komunidade prodús agora kuantidade sei ki’ik. Kompradór sira-nia hakarak ne’e, sosa mina nuu ho kuantidade ne’ebé boot,” Alberto Guterres hateten ba TATOLI iha Postu Vikeke Vila, Segunda ne’e.
Nia konta, foin lalais sosa-na’in ida husi Munisípiu Baukau hakarak sosa mina nuu ho bidón, maibé ADRA identifika produsaun mina nuu iha Vikeke la to’o bidón.
Iha Munisípiu Vikeke fatin sira-ne’ebé nuu barak mak hanesan Suku Bahalara-Uain, Postu Vikeke Vila, Uatulari no Uatukarbau, maibé komunidade prodús mina nuu seidauk atinji to’o bidón.
“Ne’e duni, ita mak presiza buka estratéjia oinsá mak bele hetan matéria prima nuu, atu ita-nia komunidade bele prodús mina nunu. Aleinde ne’e, Governu mós presiza apoia komunidade liuliu ekipamentu no fundu nune’e bele reforsa komunidade hasa’e kuantidade mina nuu,” nia hato’o.
Notísia relevante: Feto sira iha suku Uma-Uain Leten prodús mina nuu
Tuir nia hakarak osan sirkula iha rai-laran no labele dependénsia ba mina bimoli husi nasaun importandu sira, tan ne’e dalan di’ak mak dezenvolve produsaun mina nuu iha rai-laran.
Nia observa, iha Munisípiu Vikeke Kooperativa Tane Malu no Kooperativa Hamaifor prodús mina nuu no mina virjen no grupu ida tan iha Suku Uma-Ua’in Leten.
Jornalista: Vitorino Lopez da Costa
Editór: Xisto Freitas da Piedade
