DILI, 29 Setembru 2025 (TATOLI)–Prezidente Repúblika, José Ramos-Horta, husu Governu atu implementa Lei Revoga Pensaun Mensál Vitalísia ba Depuatdu no Eis-Titulár Órgaun Soberania no Providénsia sira seluk ne’ebé nia promulga ne’e, ho fuan no kuidadu atu labele halo kanek ema seluk nia fuan.
Notísia Relevante: Prezidente Ramos-Horta promulga Lei Revoga Pensaun Mensál Vitalísia
“Ha’u rekomenda ba Governu mak ida-ne’e, lei ne’e sai ona, ha’u promulga ona, tenke sukat didi’ak iha nia implementasaun, nia ezekusaun tenke halo ho fuan ho dignidade ba ema hirak ne’ebé afetadu,” Prezidente Ramos-Horta hateten ba jornalista sira liuhusi konferénsia imprensa ne’ebé hala’o iha Palásiu Prezidensiál Nicolau Lobato, Bairru Pite, segunda ne’e.
Nia dehan, bele kumpre lei tanba importante tebes no lei ne’e hetan aprovasaun ho unaminidade husi Parlamentu Nasionál hodi responde ba oponiaun públiku ne’ebé konsidera injustisa iha nasaun ne’e.
“Lei ne’e tenke kumpre maibé haree halo didi’ak. Tuir opiniaun públiku nian katak lei ne’ebé revoga ona ne’e fó liu benefisiu ba ema balun entaun ita hasai maibé tenke haree mós ema balun nia direitu. Líder balun la’ós de’it eis-Titulár, lider balun tinan 50 ona fó kontribuisaun ba rai ida-ne’e, iha tempu luta no tempu Estadu foun, ida-ne’e ita tenke haree didi’ak,” nia dehan.
Tuir Ramos-Horta, lider hirak ne’ebé fó kontribuisaun ba luta libertasaun nasionál no harii Estadu tenke haree sira-nia direitu liuhusi lei veteranu sira-nian no lei asisténsia sosiál.
“Kona-ba líder sira-nia rezidénsia ka uma tenke haree mós, la’ós lei ne’e sai implementa kedan ohin no aban, tenke haree hodi fó oportunidade ba afetadu ne’e bele aluga, ita labele hasai maibé kada fulan tenke selu ba Estadu. Karik nia iha osan bele sosa tia uma Estadu ne’ebé nia hela ne’e. Iha Dili laran, uma antigu balun Estadu nian barak ona mak Ministériu Justisa fan ona ba sidadaun balun, entaun ne’e normál bele halo. Maibé, Governu mak haree didi’ak, halo diálogu, trata lider sira, veteranu sira ho dignidade,” nia dehan.
Nia hatutan, líder sira-ne’ebé Governu presiza haree ho didi’ak mak eis-Prezidente Repúblika, eis-Primeiru-Ministru, eis-Prezidente Parlamentu Nasionál no Prezidente Tribunál Rekursu.
“Governu presiza haree ho didi’ak mak eis-Prezidente Repúblika, eis-Primeiru-Ministru, eis-Prezidente Parlamentu Nasionál no Prezidente Tribunál Rekursu, ema sira-ne’e mak Governu presiza haree. La’ós mai ho ansi hanesan rai-nakdoko boot ida. Ha’u hasoru ona Primeiru-Ministru, nia mós estuda lei ne’e ho didi’ak, haree ho lei finansa nian, lei reforma nian no lei veteranu nian, laiha problema no tenke implementa lei sira ho justisa,” nia hateten.
Lei ne’e, promulga bazeia ba Dekretu Parlamentu Nasionál No. 21/2025, ne’ebé revoga pensaun vitalísia no benefísiu sira seluk ne’ebé fó ba eis-deputadu sira, eis-membru Governu sira, no eis-xefe órgaun soberanu sira, no desizaun ida-ne’e retroativu ba loron 20 fulan-Maiu tinan 2002
Jornalista : Hortencio Sanchez
Editór : Cancio Ximenes
