Governu aloka $7000 selebra adezaun ASEAN
VIKEKE, 30 Setembru 2025 (TATOLI)—Governu sentrál lihusi Ministériu Administrasaun Estatál (MAE) aloka orsamentu hamutuk $7000 ba Autoridade Munisípiu Vikeke hodi selebra Timor-Leste nia adezaun ba Association of Southeast Asian Nations (ASEAN), iha loron 26 Setembru 2025.
Koordenadór Mini Komisaun Organizadora ba selebrasaun adezaun ASEAN iha Munisípiu Vikeke, Francisco Soares Varela haktuir kona-ba Timor-Leste nia adezaun ba ASEAN autoridade munisípiu halo preparasaun no forma ona komisaun tanba serimónia ne’e Governu sentrál mak sei aloka orsamentu ba selebrasaun referida.
“Sekuénsia serimónia selebrasaun adezaun Timor-Leste nian ba ASEAN, Governu sentrál orienta ona munisípiu atu realiza envetu sira hanesan fahe kamizola ASEAN, bandeira ASEAN no bandeira Timor-Leste ba komunidade iha suku no postu, loke tranzmisaun direta iha munisípiu hodi populasaun sira asesu diskursu abertura Timor-Leste tama ba ASEAN no konsertu muzikál,” Francisco Soares Varela ba TATOLI iha ninia kna’ar fatin, Tersa ne’e.
Notísia relevante: KM aprova rezolusaun 14 apoia Timor-Leste nia adezaun ba mempru plena ASEAN
Francisco hatutan serimónia ba selebrasaun adezaun ne’e sei realiza iha resintu Administrasaun Munisipál Vikeke, iha tuku 5:00 lokraik, ne’ebé komisaun organizadóra sei mobiliza populasaun no espesialmente estudante hodi hatene istória ASEAN nian.
“Iha oportunidade ida-ne’e ami hakarak husu ba populasaun iha Munisípiu Vikeke atu partisipa iha serimónia adezaun ba ASEAN,” nia apela.
Enkuantu, orsamentu $7000 ne’e sei gasta ba mobiliza populasaun, imprime bandeira ASEAN, prodús kamizola ba suku no postu sira, preparasaun ba materiál tranzmisaun direta, aluga tenda no konsertu muzikál.
Jornalista: Vitorino Lopez da Costa
Editór: Xisto Freitas da Piedade
