Governu kontinua proteje Eis-Titulár sira ho dignu
DILI, 30 Setembru (TATOLI)–Ministru Justisa (MJ), Sergio Hornai, hateten Governu kontinua proteje Eis-Titulár sira ho dignu, maske Parlamentu Nasionál aprova ho unanimidade projetu-lei Revoga Pensaun Mensál Vitalisia no Prezidente Repúblika, José Ramos-Horta, promulga ona iha segunda (29 Setembru 2025) ne’e.
Notísia Relevane: Prezidente Ramos-Horta promulga Lei Revoga Pensaun Mensál Vitalísia
“Sira agora hela iha rai Estadu nian. Lei anteriór fó dalan ba ita-nia Eis-Titulár sira atu hela iha fatin Estadu nian, maibé lei ne’e hasai ona, ita tenke trata nafatin sira ho dignu liuliu ita-nia Eis-Titulár sira,. Ha’u, membru Governu laiha problema, maibé Eis-Titulár sira tenke trata ho dignu,” Ministru ne’e hateten ba jornalista sira iha Palásiu Prezidensiál Nicolau Lobato, Bairru Pite, tersa ne’e.
Nia dehan, tenke trata Eis-Titulár sira ho dignu tanba nasaun ne’e atu hamriik liuhusi prosesu ida no husi Eis-Titulár sira-nia esforsu mós.
“Ita tenke hatene, antes ita hotu hamriik iha fatin ida-ne’e liuhusi prosesu ida mak ohin loron ita hamriik iha fatin ida-ne’e. Ita-nia Prezidente Repúblika mós ko’alia maka’as ona lei ne’e sai ona tenke implementa ho fuan, tarta ema hotu ho dignu,” nia dehan.
Tanba ne’e, nia dehan, Governu sei haree hela meiu hotu atu trata Eis-Titulár sira liuhusi dalan seluk atu valoriza nafatin líder hirak ne’e.
“Se ita la trata sira hanesan ona Eis-Titulár, iha dalan seluk atu trata sira iha fatin ida-ne’ebé dignu ba sira. Buat sira-ne’e Governu sei haree. Tenke halo tratamentu ida espesiál ba sira hanesan ita-nia Eis-Kombatente sira hotu ne’ebé kontribui eskluzivamente ba iha prosesu luta, ita hotu hola parte iha prosesu ne’e maibé ema dirije ita,” nia hateten.
Nia hatutan, bainhira Eis-Titulár balu hakarak hamamuk ona fatin ne’ebé durante sira hela ba ne’e, laiha problema tanba sidadaun ida-nia direitu Governu nafatin respeita.
“Ema ida-nia direitu ita nafatin respeita maibé Governu tenke kautela buat sira-ne’e. Governu tenke iha vizaun atu haree sasán hirak ne’e. Hanesan Ministru ne’ebé toma konta ba rai no sasán Estadu nian sei haree, atu regulariza ho forma ne’ebé dignu ba Eis-Titulár sira. Maibé, sira balun hakarak sai ona husi fatin sira hela ne’e sira nia direitu, maibé ita nafatin trata sira ho dignu iha nasaun ida-ne’e,” nia dehan.
Notísia Relevante: Taur Matan Ruak desmantela Gabinete Eis Titulár no deside la uza ona Karreta Estadu
Jornalista : Hortencio Sanchez
Editór : Cancio Ximenes
