PR Ramos-Horta observa fatin ba futuru instalasaun Supremu Tribunál Justisa
DILI 30 Setembru 2025 (TATOLI)–Prezidente Repúblika (PR), José Ramos-Horta halo vizita ba iha edifísiu Tribunál tuan iha Kolmera – Dili, hodi haree besik kondisaun ba futuru instalasaun Supremu Tribunál Justisa temporária.
Prezidente Tribunál Rekursu, Afonso Carmona hamutuk ho ninia estrutura konvida PR Ramos-Horta atu halo vizita bá fatin ne’e.
“Kuandu ha’u rona atu muda ka atu tau Tribunál Supremu iha ne’e, ha’u mós iha kuriozidade de’it hakarak mai haree. Prezidente Tribunál Rekursu mós fó nia tempu no disponibilidade para mai hatudu fatin ida-ne’e atu sai sede ba Tribunál Supremu, maibé fatin ida-ne’e sei instala ba Tribunál Supremu hanesan temporáriu, tanba dezeñu ba Tribunál foun Supremu iha ona, rai mós iha ona,” Xefe Estadu hateten ba Ajénsia TATOLI hafoin halo vizita ba edifísiu tuan Tribunál Dili, Kolmera, Tersa ne’e.
Notísia relevante : PTR Carmona otimista instalasaun Supremu Tribunál Justisa sei ramata iha 2026
Nia dehan, instalasaun ba Supremu Tribunál Justisa ne’e sei realiza iha fulan-neen ka tinan-ida nia laran, maibé tuir planu bele inaugura ona iha tinan oin.
“Se Tribunál Supremu tuir karik planu, konforme ita hotu hakarak bele inaugura iha Maiu 2026 ou labele karik Novembru 2026 edifísiu ne’e tenke prontu simu. Tanba ne’e tenke haree daudaun ona,” nia katak.
Maski nune’e, Xefe Estadu dehan, atu instala Supremu Tribunál la’ós nia kompeténsi maibé Governu nia kompeténsia.
“Ha’u mai haree de’it, ne’e lá’os ha’u-nia kompeténsia, ne’e totalmente responsabilidade Ministériu Justisa mak haree ba infraestrutura sira setór justisa,” nia katak.
Iha vizita ne’e, PR Ramos-Horta la fó orientasaun ba Tribunál Rekursu no Governu atu aselera instalasaun maibé fó apoiu totál ba inisiativa ne’e.
“Lae, ne’e ha’u entrega 100 pursentu ba Governu, Ministériu Justisa mak hatene, kalendáriu ha’u-nia hanoin Tribunál Supremu tenke kria duni 2026, target Maiu, maibé labele karik Maiu pelu menus halo iha Novembru,” PR tenik.
Tuir kalendáriu eleitorál se la halo iha tinan 2026 difísil atu halo iha 2027 tanba liga ho Eleisaun Prezidensiál no 2028 Eleisaun Parlamentár.
“Entaun ha’u la fiar Prezidente mai, ha’u la fiar no hamutuk ho Governu ne’ebé atu sai daudaun ona bele aselera para kria tiha Tribunál Supremu,” Xefe Governu hato’o.
Iha fatin hanesan, Prezidente Tribunál Rekursu, Afonso Carmona hateten, Supremu Tribunál Justisa ne’e presiza kordenasaun serbisu entre Governu iha kestaun ida mak Minstériu Justisa para haree instalasaun.
“Fatin ida-ne’e ita sei halo reabilitasaun ho didi’ak, sala ba Juíz Konselleiru sira ne’ebé serbisu iha Supremu Tribunál fatin tenke dignu tanba tanba sira ne’e nível la’os hanesan Juíz baibain tanba ita presiza instala liña internet no fatin sala vizita inklui sala ba Juíz Konselleiru tenke di’ak,” nia dehan.
Jornalista : Natalino Costa
Editora : Julia Chatarina
