DILI, 30 Setembru 2025 (TATOLI)–Prezidente Tribunál Rekursu (PTR), Afonso Carmona otimista katal instalasaun Supremu Tribunál Justisa sei konklui iha tinan 2026.
PTR hasai ona despaisu ba tékniku sira iha Tribunál Rekursu atu haree hodi kompletu buat balun ne’ebé seidauk kompletu.
“Tuir kalendáriu ne’ebé iha katak ita-nia instalasaun ba Supremu Tribunál Justisa sei konklui iha tinan oin. Entaun, serbisu sira hahú la’o ona. Entaun ha’u garante katak molok 20 Maiu tinan oin ita-nia instalasaun Supremu Tribunál konklui ona,” Carmona hato’o ba Ajénsia TATOLI iha ninia knaar fatin, Kaikoli, Tersa ne’e.
Notísia relevante : TR propoin adisionál hodi harii Supremu Tribunál Justisa
Tuir planu instalasaun ba Supremu Tribunál Justisa sei halo iha edífisiu tuan Tribunál Distritál Dili, iha Kolmera.
“Rai ba konstrusaun edifísiu Supremu Tribunál Justisa kontinua halo iha rai ida iha Tribunál Rekursu nia sorin ne’e, maibé ita sei uza edifísiu tuan Tribunál Dili hodi instala Supremu Tribunál Justisa,” nia informa.
Jornalista : Natalino Costa
Editora : Julia Chatarina
