DILI, 01 Outubru 2025 (TATOLI)-Komisaun Anti-Korrupsaun (CAC, sigla portugés) serbisu hamutuk ho entidade relevante sira hodi dezenvolve hela matéria Anti-Korrupsaun hodi introdús iha kurríkulu nasionál ensinu superiór.
Komisáriu CAC, Rui Pereira dos Santos, dehan bainhira elaborasaun ba matéria ne’e finaliza maka sei introdús ba estudante sira.
“Nune’e, sira bele iha koñesimentu kle’an kona-ba asuntu korrupsaun nian”, dirijente ne’e hateten hafoin aprezenta relatóriu servisu CAC nian ba Prezidente Parlamentu Nasionál, Maria Fernanda Lay, iha sala konferénsia, ohin,
CAC hamutuk ho instituisaun Estadu sira estabelese ona komisaun orientasaun hodi dezenvolve Estratéjia Nasionál Anti-Korrupsaun (ENAK) hodi prevene korrupsaun iha instituisaun Estadu sira.
Komisaun ne’e harii bazeia ba lei númeru 7/2020-Medida sira ba Prevensaun no Kombate Korrupsaun (MPKK) iha artigu 2. Nune’e mós kumpre ba obrigasaun sira Konvensaun Nasaun Unida nian Kontra Korrupsaun (UNCAC, sigla inglés) iha Kapítulu II, artigu 5 nian.
Adjuntu Komisáriu CAC ba asuntu Prevensaun no Sensibilizasaun, Rosário Salsinha Araújo, hatete polítika estabelese ENAK reflete ba asuntu importante tolu mak hanesan represiva, preventiva no edukasaun anti-korrupsaun, nune’e labele mosu aktu korrupsaun iha instituisaun Estadu sira.
Notísia relevante: CAC identifika irregularidade projetu lima iha Vikeke
Jornalista: Nelson de Sousa
Editora: Maria Auxiliadora
