DILI, 01 Outubru 2025 (TATOLI) – Ministru Obra Públika, Samuel Marçal, husu ba públiku ne’ebé hakarak loke loja ka konstrui edifísiu ruma iha fatin públiku tenke iha estasionamentu, nune’e labele afeta ba engarrafamentu.
Daudaun ne’e públiku preokupa ho fatin paranjen iha edifísiu no loja balu iha Dili, ne’ebé barak mak laiha no hamosu engarafamentu. Tanba ne’e, Ministériu Obra Públika (MOP) sei tau atensaun ba situasaun sira ne’e.
“Ha’u haree loja balu iha Dili sira foin konstrui, ha’u husu para fatin iha ka la’e, mak laiha labele halo, tanba hamosu engarrafamentu”, Samuel Marçal hateten iha Meet the Press, iha Palásiu Governu.
Nia parte husu mós ba instituisaun públika sira ne’ebé hakarak atu halo konstrusaun ba edifísiu ruma tenke dezeña kedas fatin parajen nian. “Tanba ne’e mak projetu sira tama, antes aprova, ha’u sempre haree dezeñu sira ne’e mak foin aprova”.
Aleinde ne’e, MOP mós planeia muda sai armazein boot sira iha kapitál, tanba karreta tronton sira ne’ebé lori sasán hamosu engarrafamentu, nomós estraga alkatraun sira tanba todan.
Atu muda sai armazein boot sira iha Dili, ministru dehan ne’e serbisu integradu ho ministériu sira no daudaun halo ona koordenasaun ho Ministériu Justisa atu buka rai mamuk iha Tíbar hodi muda hotu armazein sira iha Dili.
Notísia relevante: Loja-na’in presiza rekruta pesoál parajen hodi prevene engarrafamentu
Jornalista: Arminda Fonseca
Editora: Maria Auxiliadora
