OEKUSI, 01 Outubru 2025 (TATOLI) – Prokuradór Jerál Repúblika (PJR), Nelson Carvalho, kuarta ne’e, fó tomada pose ba Prokuradór José Elo nu’udar Koordenadór ba Ministériu Públiku Primeira Instánsia, Rejiaun Administrativa Espesiál Oekusi Ambeno (RAEOA) ho mandatu tinan tolu (2025-2028) hodi troka Koordenadór Prokuradór Mateus Nessi.
Notísia relevante:Ministériu Públiku Oekusi presiza edifísiu foun no fatin ba objetu apreendidu
Iha ámbitu seremónia referidu, Prokuradór Jerál Repúblika, Nelson Carvalho, aifrma, ho prezenta lideransa foun, la’ós de’it kontinuidade serbisu públiku maibé oportunidade renovavel, hodi reforsa pilár sira-ne’ebé sustenta ba atuasaun, legalidade no imparsialidade, izensaun no étika.
Tanba husi valór sira-ne’e, mak hetan konfiansa husi sidadaun sira iha justisa no tenke orientadu iha permanénsia no intervensaun husi Ministériu Públiku.
“Asumi funsaun ida-ne’e, sei ezerse misaun nobre no dirijente, ha’u konfia plenamente iha ita-bo’ot nia kapasidade lidera ho integridade, kompeténsia no espiritu serbisu nian iha Prokuradória Primeira Instánsia Oekusi, hanesan ezemplu rigór ida, transparénsia, produtividade no kompromisu ho justisa. Ha’u-nia dezeju ba ita-bo’ot ho korajen sabedória,” Nelson Carvallo hato’o, iha nia diskursu, iha salaun edukasaun Oekusi, ohin.
Nia espera, durante nia lideransa, sei fó onra no reforsa ba kompromisu koletivu ho justisa, saudasaun espesiál ba Prokuradór sira-ne’ebé iha Prokuradória Primeira Instánsia Oekusi, sei artikula ba lejitímu ba sira-nia misaun, orgaun polísia kriminál nian, tribunál sira, Autoridade rejionál sira ho instituisaun sira hotu, katak ein-respeitu mutu no iha kooperasaun institusionál, kontribui ba justisa efikás liu, besikliu ba sidadaun hotu, no digna ba Estadu Direitu Demokrátiku, ne’ebé ita konstrui hamutuk.
“Atu termina, ha’u mós respeitu tebes ba koordenadór sesante Mateus Nessi, tanba durante ne’e halo serbisu maka’as ho responsabilidade ho étika, profisonalizmu ne’ebé iha, hodi lidera Ministériu Públiku, Prokuradória Primeira Instánsia Oekusi, durante ne’e to’o ohin loron nia hetan fali prokuradór foun ida atu haforsa serbisu sira,” nia orgullu.
Iha biban ne’e, Prokuradór Emposadu, José Elo, agradese ba konfiansa tomak husi Prokuradór Jerál Repúblika, atu dirije, koordena no fiskaliza atividade Ministériu Públiku iha Prokuradória Repúblika Primeira Instánsia Oekusi junta ho tribunál judisiál ba mandatu tinan tolu tuir lei novu estatutu Ministériu Públiku.
“Hahú ohin ba oin, tula ona mai ha’u-nia kaba’as, responsabilidade ida-ne’ebé bo’ot, atu kontinua serbisu maka’as, hodi reprezenta Ministériu Públiku nia ezisténsia iha Oekusi,” nia hateten.
Nia promete, iha mandatu tinan tolu, sei artikula no promove kooperasaun serbisu ho instituisaun relevante sira, hanesan tribunál, Autoridade PNTL, Organizasaun Naun Governamentál (ONG) sira-ne’ebé fó asisténsia legál ba lezadu ka vítima sira ba relasaun serbisu administrasaun Ministériu Públiku.
“Ha’u bele hateten, katak prezensa Ministériu Públiku junta ho Tribunál Judisiál atu-bele fó resposta konkreta ba prestasaun serbisu públiku iha área justisa nian, tanba ne’e, ha’u lakohi halo promesa barak, perante Prokuradór Jerál Repúblika, maibé fó fiar mai ha’u, ho koordenadór sesante, ne’ebé iha esperiénsia barak durante lidera Prokuradória Primeira Instánsia Oekusi no hamutuk ho funsionáriu sira, sei halo serbisu maka’as, ho dedikasaun tomak atu fó atendimentu ba públiku ho efisiénsia no efikás ba sira-ne’ebé buka hela justisa,” nia promete.
Entretantu, Prokuradór José Elo, moris iha loron 25 Agostu 1982, iha aldeia Tumin Suku Bobometo sub-rejiaun Oésilo, Rejiaun Administrativa Espesiál Oekusi Ambeno (RAEOA).
Jornalista: Abílio Elo Nini
Editór: Rafael Ximenes de A. Belo
