OEKUSI, 30 Jullu 2025 (TATOLI) – Koordenadór Prokuradór Jerál Repúblika Primeira Instánsia Oekusi, Mateus Nessi informa katak Ministériu Públiku iha Rejiaun Administrativa Espesiál Oekusi Ambeno (RAEOA) presiza edifísiu foun no mós fatin atu asegura objetu apreendidu sira inklui fatin atu rai arkivu nian.
Mateus Nessi, fó-sai problema ne’e ba Prezidente Autoridade RAEOA, Rogério Tiago Lobato, bainhira hala’o vizita ofisiál iha Ministériu Públiku, foin lalais ne’e.
Nia lembra, iha tinan hirak ba kotuk akontese inundasaun no afeta mós ba Ministériu Públiku Oekusi no bele estraga sasán liuliu prosesu sira, inklui sasán ka objetu apreendidu sira tau de’it li’ur tanba laiha fatin própriu atu hetan mahon inklui fatin atu rai arkivu sira.
“Ami-nia problema primeiru mak fasilidade liuliu infraestrutura, tanba kondisaun no espasu ladun luan, entaun kada tinan akontese inundasaun beibeik iha ami-nia fatin, depois problema ida tan mak fatin atu asegura objetu apreendidu sira, terseiru mak espasu ba arkivu sira laiha,” Mateus Nessi hato’o, iha enkontru kortézia ho Prezidente Autoridade RAEOA.
Notísia relevante:PGR Nelson Carvalho rekomenda pontu rua ba Autoridade RAEOA
Nia informa, problema hirak-ne’e, antes ne’e relata ona ba iha nasionál liuliu Prokudarór Jerál Repúblika, atu konsidera no koordena ona ho Autoridade RAEOA liuliu fatin no konstrusaun foun.
“Ami-nia problema hirak-ne’e, mak foin daudaun Prokuradór Jerál Repúblika hato’o ona iha Prezidente Autoridade RAEOA. Katak, kazu barak akontese iha Oekusi, ami labele rai iha Ministériu Públiku tanba fatin limitadu, sasán kontra-bandu mak barak tebes iha Oekusi, hanesan karreta, motorizada, bero no gozoliña, gazoel inklui sasán seluktan, tan ne’e liuhusi vizita ohin, bele haree rasik, nune’e ba futuru bele tau matan,” nia ko’alia no otimista.
Kona-ba kazu krime sira, nia dehan, kazu rejista barakliu iha Ministériu Públiku mak kontra-bandu, ofensa integridade fízika, violénsia doméstika no violasaun seksuál.
Notísia relevante:Defensór Afonso Gomes propoin ba Autoridade harii prizaun iha Oekusi
Hatan ba rekomendasaun ne’e, Prezidente Autoridade RAEOA Rogério Tiago Lobato, rekoñese tanba antes ne’e Prokuradór Jerál Repúbliku relata ona liuhusi enkontru kortezia.
“Ha’u mai haree sira-nia kondisaun fatin serbisu no edifisíu, atu halo serbisu ba Estadu, ita tenke iha kondisaun serbisu, tan ne’e mak ha’u mai atu haree tanba antes ne’e Prokuradór Jerál Repúblika, ami ko’alia ona atu apoia fatin ho edifísiu foun,” Lobato dehan.
Tuir autoridade RAEOA ne’e katak iha enkontru ofisiál ne’e, parte Ministériu Públika, aprezenta problema barak hanesan, fatin atu tau arkivu sira, asegura sasán apreendidu sira, ema sira-ne’ebé mai tuir julgamentu maibé fatin atu hein laiha.
“Entaun ha’u hanesan Prezidente Autoridade, ha’u hakarak atu rona, atu oinsa bele koopera ba malu, atu hadi’a serbisu liuliu iha setór justisa, ha’u rona ona preokupasaun no haree direita ona, ne’ebé ha’u sei ko’alia ho Ministériu Justisa no Prokuradór Jerál Repúblika, oinsa mak Autoridade RAEOA bele koopera, tanba Estadu ne’e ida de’it, maibé ita iha ne’e autonomia, dalaruma ita tenki halo koordenasaun atu labele iha duplikasaun esforsu,” nia promete.
Notísia relevante:Enkontru kortezia ho PA RAEOA, Juís tribunál Oekusi aprezenta problema rua
Entretantu, totál funsionáriu hala’o serbisu iha Ministériu Públiku Primeira Instansia Oekusi hamutuk na’in-14 komposta husi Prokuradór na’in-rua, ofisiál justisa na’in-neen, motorista no serbisu administrasaun nian, no fasilidade ne’ebé utiliza mak, hanesan edifísiu ida ho kuartu 10, armazen ida, no rezidénsia tolu.
Jornalista: Abílio Elo Nini
Editór: Rafael Ximenes de A. Belo
