OEKUSI, 01 Agostu 2025 (TATOLI) – Koordenadór Defensoria Públika iha Rejiaun Administrativa Espesiál Oekusi Ambeno (RAEOA) Afonso Gomes Fátima, propoin ba Autoridade Rejiaun Administrativa Espesiál Oekusi Ambeno (RAEOA), atu harii prizaun ida iha Oekusi.
Defensór Públiku, Afonso Gomes Fátima, rekomenda pedidu ne’e, bainhira hala’o enkontru ofisiál ho Prezidente Autoridade RAEOA iha edifisíu Defensória Públika Oekusi, kinta ne’e.
Notísia relevante:Transporte no rekursu umanu sai difikuldade iha Defensoria Públika Oekusi
Nia hateten, harii prizaun iha Oekusi importante tanba hanesan direitu ba prezu sira, bainhira hetan vízita husi sira-nia família, nu’udar motivasaun no halo komunikasaun beibeik atu evita sira-nia presaun psikolojia.
“Ami hanesan Defensór Públiku, sempre besikliu rekluzu sira, no vizita beibeik atu hatene sira-nia kondisaun, maibé problema mak laiha família atu vizita sira, tanba distánsia do’ok, família tenke gasta osan, liuhusi transporte aero, marítima no terrestre,” Afonso Gomes Fátima dehan, iha ámbitu enkontru ne’e.
Defensór Públiku ne’e, observa katak, durante tinan barak difikuldade ba povu Oekusi mak hanesan ne’e, dalaruma arguidu hetan kondenasaun ba ona iha prizaun Bekora, nia ba ho ropa tahan ida ne’ebé tau ona, família la ba tuir atu haree, entaun arguidu hanoin barak, maibé família atu ba vizita difikuldade mak ekonomia, osan atu sa’e ró ba Dili, han-hemu, depois to’o Dili atu hela iha ne’ebé, dalaruma sira vizita hotu, hein de’it ró iha portu, atu lorokraik fila kedas.
“Entaun liuhusi sorumutu ohin ami husu ba Autoridade RAEOA bainhira halo ona prizaun ida iha Oekusi, arguidu ka priozioneiru sira família mós iha direita hanesan mós rekluzu seluk, depois fasílita mós família sira bele vizita, beibeik hodi motiva sira atu muda hahalok ne’ebé sira prátika,” nia rekomenda.
Notísia relevante:Abitante Oésilo husu MJ harii prizaun iha Oekusi
Hatan ba rekomendasaun ne’e, Prezidente Autoridade RAEOA, Rogério Tiago Lobato, informa katak, fatin atu harii prizaun, Diresaun Rejionál Infraestrutura halo levantamentu, lokaliza iha suku Lalisuk, maibé sei koordena ho Ministériu Justisa.
“Atu loke kadeia iha Oekusi, ne’e ha’u hanoin kle’ur tiha ona. Ha’u rasik ho xefe suku Lalisuk ami haree ona fatin iha suku Lalisuk, fatin do’ok uitoan husi vila, no rai luan. Iha tempu-badak ha’u sei koordena ho Diresaun Rejionál Infraestrutura atu ba halo ona levantamentu, atu halo kadeia ida, maibé molok atu harii, ha’u mós ko’alia Ministru Justisa. Ne’ebé, preokupasaun ha’u simu hanesan mós preokupasaun administrasaun RAEOA nian, nu’udar rejiaun espesiál,”nia dehan.
Notísia relevante:Alterasaun rejime tranzitóriu rekrutamentu Majistradu no Defensór Públiku diskute ho urjénsia
Jornalista: Abílio Elo Nini
Editór: Rafael Ximenes de A. Belo
