OEKUSI, 16 Jullu 2025 (TATOLI) – Prokuradór-Gerál Repúblika (PGR), Nelson de Carvalho, rekomenda pontu importante rua ba Prezidente Autoridade Rejiaun Administrativa Espesiál Oekusi Ambeno (RAEOA), Rogério Tiago Lobato, hodi konsidera, atu apoia konstrusaun edifísiu ba Ministériu Públiku Oekusi nian no rai.
PGR Nelson de Carvalho, hato’o pontu importante rua ne’e, iha ámbitu enkontru kortezia ho Autoridade RAEOA, lideradu hosi Prezidente Autoridade RAEOA, Rogério Tiago Lobato, iha salaun Gabinete Oekusi, tersa ne’e.
“Ohin ami enkontru, hato’o pontu rua de’it ba Prezidente Autoridade RAEOA, kona-ba atividade Ministériu Públiku nian, ho situsaun no kondisaun defisil, ne’ebé mak agora daudaun iha Oekusi, primeiru mak ne’e, husu ba Prezidente RAEOA rasik kona-ba fatin ne’ebé iha Ministériu Públiku, sei iha difikuldade, entaun presiza atu haree konstrusaun edifisíu prokuradór Oekusi nian, inklui fatin ka rai ruma,” nia informa ba jornalista sira hafoin ramata enkontru iha salaun Gabinete Prezidente RAEOA Oekusi.
Notísia relevante: https://tatoli.tl/2025/05/13/jurista-sergio-quintas-la-duvida-kapasidade-prokurador-nelson-de-carvalho/
Tuir PGR, presiza apoia edifísiu no rai, tanba haree volume númeru krime aumenta beibeik, depois haree mós ba kondisaun testamuña lezadu-lezada sira no arguidu mós kria kondisaun ba sira, apenas sira-bele komete krime ruma maibé nu’udar umanu hanesan ema moris, tenki tau mós ho dignu.
“Ne’ebé enkontru ne’e, iha rezultadu pozitivu, haree ami hamnasa ne’e, signifika iha responde ruma husi Autoridade RAEOA, maibé sei iha prosesu nia laran,” nia afirma.
Iha biban ne’e, Prezidente Autoridade RAEOA, Rogério Tiago Lobato, konsidera rekomendasaun sira-ne’e importante atu hadi’a setór justisa, nune’e bele hala’o serbisu ho avontade.
“Ohin ha’u simu ona rekomendasaun rua ne’e, ida kona-ba konstrusaun edifísiu no ida kona-ba rai ka fatin, ne’ebé ha’u sei ko’alia ho Sekretáriu Terra Propriedade atu identifika hela fatin, depois ba edifísiu ida-ne’e ita sei haree osan uitoan, kuandu iha ita bele rezolve iha tinan ne’e, kuandu la sufisiente entaun, bele adia ba tinan oin, tanba RAEOA ne’e autónomu espesiál, ita tenki hadi’a duni ita-nia setór justisa iha Oekusi, atu tulun funsionáriu sira bele serbisu ho avontade,” nia hateten.
Notísia relevante: https://tatoli.tl/2024/06/05/ekipa-grupu-traballu-aprezenta-planu-roteiru-hadia-setor-justisa-ba-governu/
Jornalista: Abílio Elo Nini
Editór: Rafael Ximenes de A. Belo
