Brandão husu Diretór Servisu Saude hotu tenke pro-ativu atende komunidade
DILI, 02 Outubru 2025 (TATOLI)—Vise-Ministru Saúde ba Operasionalizasaun Ospitál, Flávio Brandão Mendes de Araújo, husu Diretór Servisu Saúde nasionál no munisípiu sira hotu atu pro-ativu iha servisu fó atendementu ba komunidade.
“Ha’u alerta ba Diretora Ezekutivu Institutu Nacionál Farmásia no Produtu Médiku (INFPM) tenke halo koordenasaun di’ak ho Diretór Servisu Saúde sira atu pro-ativu, servisu ho sériu hodi fó atendementu ba ita nia komunidade,” Vise-Ministru ne’e hateten ba jornalista sira iha edifisiu INFPM Kampung Alor, kinta ne’e.
Nune’e, Governante ne’e husu ba INFPM tenke koordena di’ak mós ho Diretór Servisu Saúde sira hodi haree ba kestaun ai-moruk tanba Governu gasta ona osan barak hodi sosa ai-moruk.
“Halo servisu labele dehan ai-moruk laiha hela deit, tanba ai-moruk sira-ne’ebé ita sosa balun sei iha dalan, maibé ita mós tenke iha rezerva atu utiliza ba neseisdade ne’ebé mak emerjénsia,” nia dehan.
Nia dehan, servisu barak ladun efetivu tanba iha meiu komunikasaun maibé nia husu ba dirijente sira nafatin hala’o servisu ho efetivu.
Tanba ne’e, nia husu ba Servisu saúde hotu tenke koordena malu ba responsabilidade sira iha fatin serrvisu no ba oin tenke servisu hamutuk sai forte nune’e buat hotu bele la’o ho di’ak.
“Ha’u apela ba dirijente sira atu labele tau-an hanesan dirijente ida-ne’ebé hatene tuur de’it, maibé nia tenke la’o ba buka no halo koordenasaun ho dirijente iha instituisaun sira. Ida-ne’e mak meiu simples ne’ebé ita halo fiar katak ba oin sei sai di’ak-liu iha servisu hotu,” nia dehan.
Jornalista : Felicidade Ximenes
Editór : Cancio Ximenes
