VIKEKE, 02 Outubru 2025 (TATOLI)—Diretór Servisu Seguransa Alimentár Munisípiu Vikeke, Leantu Gomes informa implementasaun Programa Merenda Eskolár (PME) iha Munisípiu Vikeke tuir padraun.
“Bazeia monitorizasaun Diresaun Seguransa Alimentár Munisípiu Vikeke katak implementasaun PME iha Munisípiu Vikeke iha progresu di’ak tanba implementa tuir menu indikativu sira,” Leantu Gomes ba TATOLI iha ninia kna’ar fatin, edifísiu administrasaun Munisípiu Vikeke, Kinta ne’e.
Notísia relevante: https://tatoli.tl/2025/03/17/autoridade-vikeke-lansa-progrma-merenda-eskolar-2025-iha-ebc-baimeta/
Nia esplika fornesimentu ai-han prenxe kritériu menu indikativu PME ne’ebé kompostu husi parte tolu hanesan ai-han haforsa, haburas no protesaun.
Nia hatutan parte Diresaun Seguransa Alimentár fó-atensaun preparasaun ijiene saúde nian bainhira ekipa implementadór prepara hahán ba estudante sira, liuliu tenke fase lima ho sabaun nune’e estudante sira komsume ai-han karik ho ijiene ka seguru ba labarik sira-nia saúde.
Tuir dadus, EBC hamutuk 18, Ensinu Báziku Filiál 77 ho totál estudante hamutuk na’in-20.651 mak konsume PME, ho totál orasamentu ne’ebé gasta ba programa ne’e hamutuk $915.425.
Jornalista: Vitorino Lopez da Costa
Editór: Xisto Freitas da Piedade
