VIKEKE, 02 Outubru 2025 (TATOLI)—Diretór Servisu Saúde Munisípiu Vikeke, Aljacsono S. Maia informa Servisu Saúde Munisípiu (SSM) Vikeke hahú husi inísiu fulan-Janeiru to’o fulan setembru 2025 rejista ona kazu asu tata hamutuk na’in-58, maibé rezultadu teste laboratóriu la indika ba virus raiva.
“Kona-ba kazu asu tata ema ne’e agora daudaun ita rejista ona ema hamutuk na’in-58, maibé husi númeru ne’e ita lori bá laboratóriu la indika ba raiva tanba rezultadu hatudu negativu. Maski negativu ita-nia ekipa servisu vijilánsia epideomolojia kontinua fó-atensaun ba kazu raiva ne’ebé daudaun ne’e eziste iha ita-nia rai,” Aljacsono S. Maia ba TATOLI iha Postu Vikeke Vila, Kinta ne’e.
Notísia relevante: Kampaña kontra raiva iha Bobonaru: Vítima asu tata na’in-65 simu vasina
Nia haktuir SSM Vikeke servisu hamutuk ho Ministériu Agrikultura lori sampel asu tama ema bá laboratóriu hodi halo teste.
“Ita servisu hamutuk Ministériu Agrikultura parte veterinária nian halo teste ba ema na’in-58, maibé la rejista kazu pozitivu ba vírus raiva,” Aljacsono hato’o.
Nia hatutan daudaun ne’e kada loron ekipa saúde kontinua tun ba komunidade sira halo promosaun ba prevensaun ba vírus raiva, tanba ne’e papél importante ida husi parte saúde nian.
Jornalista: Vitorino Lopez da Costa
Editór: Xisto Freitas da Piedade
