DILI, 02 Outubru 2025 (TATOLI)–Ministra Edukasaun (ME), Dulce de Jesus Soares hamutuk ho manorin, estudante no inan-aman sira, Kinta ne’e, inaugura edifísiu Eskola Pré-Eskolár (EPE) Moris Foun Fatumeta.
“Ohin ita inaugura edifísiu edukasaun pre-eskolár no projetu ida-ne’e husi kapitál dezenvolvimentu tinan 2024 nian. Sira (empreza) foin finaliza iha tinan 2025, ne’ebé iha saladeaual tolu, kompleta ho nia hariis-fatin ba labarik feto no mane, koziña,” Ministra Dulce dehan ba jornalista sira, hafoin inaugura edifísiu referidu, iha Fatumeta.
Govenante ne’e hatutan tempu badak sei instala tan play group ida iha-ne’ebá hodi fasilita estudante sira. Nune’e husu responsavel edifísiu ne’e atu halo jestaun ho di’ak ba saladeaula, atubele akumula estudante sira atu aprende ho di’ak,” Ministra dehan.
“Eskola ida-ne’e iha estudante hamutuk 130. Tanba bainhira saladeaula ida mak akumula estudante 60, ha’u hanoin ita hanorin labele,” Dulce esplika.
Ministra ne’e apela ba manorin no inan-aman sira atu proteje eskola referida, atu eskola bele furak nafatin no seguru ba ki’ikoan sira.
Iha fatin hanesan, Koordenadora Eskola Pré-Eskolár Moris Foun Um Fatumeta, Domingas Beatriz da Cunha haktuir iha tinan 2000 eskola ne’e sai hanesan eskola komunidade nian.
“Maibé, iha 2003, ami-nia eskola sai Pré-eskolár Públiku Moris Foun Um. Ami hetan akreditasaun iha 2003 no ami seidauk iha fatin, nune’e iha 2014 ministra rasik mai haree no husu atu harii eskola ida-ne’e, ikus iha 2025 ne’e bele entrega ona mai ami,” nia subliña.
Entretantu, estudante iha eskola referida hamutuk 130 kompostu husi mane 58 no feto 62, fahe ba grupu rua, grupu A totál estudante 102 no grupu B ho estudante 24.
Eskola Pré-Eskolár Moris Foun Um Fatumeta konstruida iha fulan-Outobru 2024 no tuir kontratu termina iha fulan-Marsu 2025 ne’e, konstrui ho orsamentu $91.500,37, hosi Empreza Filhos Caldeiras Unipessoal, Lda.
Jornalista: Osória Marques
Editór: Xisto Freitas da Piedade
