DILI, 02 Outubru 2025 (TATOLI)–Polísia Nasionál Timor-Leste (PNTL) Munisípiu Likisá, iha Tersa (30/09) detein bangladeza na’in-rua ne’ebé suspeitadu envolve krime tráfiku umanu, lori vítima na’in-ualu sidadaun Bangladez atu bá serbisu iha Austrália.
“Iha kazu ne’e ita identifika ema na’in-10, rua hanesan suspeitu no ema na’in-ualu hanesan vítima, ne’ebé submete ona ba Ministériu Públiku,” Portavós interinu PNTL, Superindente Polísia Mouzinho Correia hateten ba Jornalista sira, iha sala Multimídia Ministériu Interiór, Vila-Verde, Kinta ne’e.
Notísia relevante : Governu lansa planu asaun nasionál kontra tráfiku umanu
Superiendente ne’e dehan, tuir investigasaun ne’ebé mak halo husi Diresaun Nasionál Investigasaun Kriminál, krime ne’e priense ba krime tráfiku umanu tanba faktu sufiente.
Iha parte seluk, Diretór Servisu Investigasaun Kriminál, Superindente Polísia João Belo hateten, PNTL deteta kazu ne’e hola parte iha tráfiku umanu, ne’ebé prosesu la’o hela no agora iha prosesu investigasaun nia laran.
Jornalista : Natalino Costa
Editora : Julia Chatarina
