Prosesu reabilitasaun estrada diresaun Kuluhun ba Bekora atinje 40%
DILI, 02 Outobru 2025 (TATOLI)—Ministru Obra Públika, Samuel Marçal, hateten prosesu reabilitasaun estrada husi Kuluhun ba Bekora atinje ona 40%, tanba daudaun ne’e kompañia Montana Diak sira hala’o hela servisu hanesan baibain ho durasaun reabilitasaun to’o tinan rua (2) mak finaliza
Notísia Relevante: Alargamentu estrada Kuluhun-Bekora ho luan metru 23,74 no naruk kilómetru 4
“Normalmente kontratu ne’ebé Governu fó ba kompañia ne’e ho durasaun tinan rua hodi implementa projetu ne’e. Imi bele ba oserva rasik, daudaun ne’e iha ona faze ida-ne’ebé. Ami mós sempre ba halo observasaun servisu sira iha terrenu, nune’e bainhira projetu laiha kualidade ita haruka hadi’a fali halo kualidade,” Ministru ne’e informa ba Agência Tatoli iha nia kna’ar fatin, Kaikoli, ohin.
Tuir nia, tamba dalan ne’e halo ba povu no osan povu nian, entaun Governu tenke kria kondisaun ne’ebé mak ho kualidade atu ema hotu bele uza ho tempu ne’ebé naruk.
Iha sorin seluk, tuir Supervizór Kompañia Montana Diak, José Pereira, hateten atinjimentu reabilitasaun estrada hahú husi Kuluhun to’o Bekora atinje ona 40%, tanba servisu lubuk ida mak sira halo ona hanesan drainajen no halo bronjon (penahan).
“Agora ami tama ona ba faze konstrusaun drainajen, kuaze servisu ne’e kee to’o parte ponte Bekora nian no bronjon balun mak finaliza ona,” nia dehan.
Enkuantu, nia hatutan, kona-ba projetu reabilitasaun estrada iha Bidau Tokobaru to’o ponte kuluhun atinje ona 75%, tanba servisu lubuk ida mak finaliza ona hanesan drainajen, jardin, kuda mós ai-funan.
“Iha parte balun mak seidauk hanesan rotunda ki’ik ne’e no fasilidades ba jardin nian ita hein de’it monta lampu ho kadeira tanba sasán sira-ne’e importasaun entaun seidauk to’o mai Timor. Bainhira to’o ona, ami sei kontinua halo kedas servisu,” nia informa.
Aleinde ne’e, nia dehan, tanba estrada sira foin fui alkatraun faze dahuluk no prosesu fui alkatraun daruak sei hala’o iha fulan-Dezembru, nune’e bele ramata ona projetu ne’e.
Jornalista : Alexandra da Costa
Editór : Cancio Ximenes
