DILI, 03 Outobru (TATOLI)—Autoridade Inspesaun Fiskalizasaun no Atividade Ekonómika Sanitária Alimentár (AIFAESA, sigla portugés) hala’o avaliasaun dezempenu no atualiza progresu servisu durante trimestre datoluk nian iha tinan 2025 ba públiku, iha ámbitu selebrasaun tinan ida AIFAESA hala’o ninia mandatu iha Governu Konstitusionál da-sia (IX) nia ukun.
Notísia Relevante: Janeiru-Setembru, AIFAESA halo inspesaun ba operadór ekonómiku 3088
“Ita hotu-hotu hatene AIFAESA nia mandatu hahú iha tinan 2024. Nune’e, aproveita ohin loron mós, ami halo avaliasaun ba dezempeñu ba iha tinan 2025 liuliu iha trimestre datoluk nian. Ami mós kontinua halo avaliasaun servisu iha tinan 2024 nian,” Inspetora Jerál Autoridade Inspesaun Fiskalizasaun no Atividade Ekonómika Sanitária Alimentár, Odete Viegas, hateten ba jornalista sira iha edifísiu AIFAESA, Matadoru, ohin.
Nia hatutan, objetivu husi avaliasaun ne’e atu haree filq-fali sira-nia servisu liuliu prestasaun servisu inklui obstakulu sira-ne’ebé relasiona ho atividade inspesaun no fiskalizasaun iha kapitál Dili inklui mós iha munisípiu sira,
“Progresu ne’ebé ami hetan durante mandatu tinan ida-ne’e mak númeru inspesaun sa’e maka’as tuir meta atu bele atinje estabelesimentu 4.000 no iha semestre datoluk ne’e ita atinje ona númeru inspesaun 3.000-resin. Aleinde ne’e mós koima ne’ebé ita rekolla ba reseita Estadu iha tinan kotuk hamutuk rihun $58. Ida-ne’e, ita konsege rekolla resita hamutuk rihun $280,” nia informa.
Aleinde ne’e, progresu seluk tan ne’ebé atinje iha trimestre datoluk kona-ba deliberasaun ba reabilitasaun laboratóriu ai-han, AIFAESA mós konsege konstrui infraestrutura kobi house, destaka ona ekipa sira iha rejiaun Oekusi.
“Enkuantu, kona-ba obstakulu ne’ebé ami enfrenta kona-ba estatutu permanente ba funsionáriu sira, tanba durante ne’e sira sai hotu funsionáriu kontratadu. Maibé, ami mós tau ona Orsamentu Jerál Estadu 2026 oinsá atu halo promosaun ba funsionáriu sira-ne’ebé servisu durante tinan naruk ona,” nia dehan.
Tanba ne’e, nia dehan, AIFAESA sei ko’alia ho Komisaun Funsaun Públiku (CFP, sigla portrugés) oinsá bele hetan estatutu permanente hodi garante sustentabilidade servisu inspesaun no fiskalizasaun, tanba AIFAESA presiza duni funsionáriu ne’ebé dedika sira-nia an hanesan funsionáriu permanente.
Nia hateten, iha tinan oin ne’e AIFAESA sei kontinua halo dezentralizasaun no sira sei reforsa servisu operasaun hodi hasa’e abilidade koñesementu ba iha funsionáriu sira liuliu iha área relasaun públika nian, ne’ebé iha papél hodi transmite informasaun servisu AIFAESA nian ba iha públiku.
Jornalista : Alexandra da Costa
Editór : Cancio Ximenes
