Anibal Carvalho: “Hahú horisehik jogu aposta online sira tenke taka”
DILI, 03 Outubru 2025 (TATOLI)–Inspetór Jerál Jogu (IGJ, sigla portugés), Anibal Carvalho, hateten bainhira Konsellu Ministru hasai ona desizaun hodi kansela lisensa ba jogu aposta online hotu iha Timor-Leste hahú horisehik jogu sira-ne’e tenke taka ona.
Notísia Relevante: Governu aprova rezolusaun proposta kanselamentu lisensa ba operasaun jogu-aposta online
Ba oin, nia hatutan, Governu sei la autoriza tan jogu aposta online atu hala’o tan atividade, ezemplu jogu sira aposta online ne’ebé hala’o atividade iha Timor-Leste mak hanesan iha Timor Plaza no Land Mark, Dili.
“Rezolusaun Konsellu Ministru númeru 54/2025, iha loron 01 fulan-Outubro, kansela ona lisensa operasaun jogu no aposta online. Ho nune’e, kona-ba jogu hotu IGJ nia responsabiliza, hahú horisehik jogu aposta online sira tenke taka ona,” Inspetór Jerál Jogu (IGJ, sigla portugés), Anibal Carvalho, hateten liuhusi konferénsia imprensa ne’ebé hala’o iha edifisiu IGJ, Vila-Verde, sesta ne’e.
Nia dehan, IGJ nu’udar órgaun reguladór ba atividade jogu iha Timor-Leste, hakruuk ba desizaun Governu nian no la autoriza tan ona jogu online sira atu halo tan atividade.
“Desizaun ne’ebé Governu implementa ona no sei hetan akompañamentu liuhusi kontrolu no monitorizasaun ne’ebé sei hala’o husi Inspetór sira husi IGJ hamutuk ho instituisaun Polísia sira sei halo kontrolu másimu,” nia dehan.
Nia hatutan, ba oin IGJ sei servisu hamutuk ho Polísia Nasionál Timor-Leste (PNTL) no Polísia Sientífiku Investigasaun Kriminál (PSIK) hodi bele kontrola másimu ba jogu sira iha territóriu tomak.
Iha okaziaun ne’e, nia husu ba públiku atu hetan jogu aposta online balun eziste iha bairru laran no fatin ne’ebé de’it tenke informa ba parte seguransa no IGJ atu halo atuasaun hodi prosesu tuir lei ne’ebé iha.
“Ami asegura nafatin akompañamentu ida-ne’ebé transparente no profisionál, atu evita grupu ka individu sira uza atividade jogu ba prátika krime. Asaun ida-ne’e, IGJ ho entidade polísia sira sempre halo beibeik dezde atividade jogu hahú no sei halo nafatin ba oin,” nia hateten.
Nia afirma, IGJ nu’udár membru permanente iha WLA (Word Lotery Association) sempre troka informasaun kona-ba modus operandi ne’ebé prátika husi grupu krime organizadu iha mundu tomak, liuhusi atividade jogu ne’ebé implementasaun regra husi IGJ kona-ba atividade jogu la’ós izoladu de’it iha Timor-Leste.
“Maibé hetan kooperasaun husi organizasaun internasionál hanesan, organizasaun rejionál iha America Latin CIBELAE (Corporacion Ibero Americana de lotarias y apuestas de Estado) ne’ebé IGJ mós iha kooperasaun, Santa casa de Misericordia de Lisboa ne’ebé ita halo mós Kooperasaun iha área barak inklui formasaun kuadru IGJ nian no troka informasaun ba malu,” nia dehan.
Durante ne’e, IGJ sempre partisipa iha Konferénsia Internasionál kona-ba atividade jogu hodi atualiza informasaun no reforsa kooperasaun entre membru WLA no organizasaun rezionál husi nasaun sira-ne’ebé legaliza atividade jogu.
“Atu informa mós 75% husi nasaun ne’ebé halo parte iha OrganizasaunNasaun Unida (ONU) sira-nia Estadu legaliza atividade jogu. Ne’ebé, asaun kombate ba krime iha jogu ne’e halo liuhusi asaun konsentrada katak iha kooperasaun entre nasaun ne’ebé legaliza atividade jogu hodi kombate krime organizadu,” nia dehan.
Desizaun Konsellu Ministru kansela jogu online
Governu liuhosi reuniaun Konsellu Ministru, Kuarta semana ne’e, deside taka jogu aposta iha online ne’ebé rejistu iha Timor-Leste.
Reuniaun Konsellu Ministru aprova ona projetu Rezolusaun Governu ne’ebé aprezenta husi Ministru Prezidénsia Konsellu Ministrus, Agio Pereira, ne’ebé determina kanselamentu lisénsa sira-ne’ebé fó ba operasaun jogu sira no aposta online.
Rezolusaun Governu ida-ne’e mós determina kanselamentu prosedimentu lisensiamentu sira-ne’ebé la’o hela no bandu lisénsa foun sira ba tipu atividade ida-ne’e, haree ba risku sira-ne’ebé identifika ona ba nasaun nia seguransa, estabilidade sosiál, integridade ekonómika no reputasaun internasionál.
Ministériu tutela hamutuk ho forsa seguransa sira, sei tau matan ba implementasaun medida sira-ne’ebé aprova ona husi Rezolusaun Governu ida-ne’e.
Diploma ne’e mós estabelese revizaun ba lejizlasaun aplikavel, liuliu Dekretu-Lei nú. 6/2016, loron 20 fulan-Abríl, ne’ebé regula setór ne’e.
Notísia Relevante: PM Xanana husu PCIC kontrola jogu ilísitu no online scam
Jornalista : Hortencio Sanchez
Editór : Cancio Ximenes
