DILI, 03 Outobru 2025 (TATOLI)—Ministru Transporte Komunikasaun (MTK), Miguel Gonçalves Manetelu, haruka ona karta pedidu kanselamentu ba Organizasaun Internasionál Marítima (IMO, sigla inglés) hodi kansela rejistu ró ilegál ne’ebé uza bandeira Timor-Leste nian.
“Maske ha’u seidauk hetan informasaun maibé komunikasaun ne’e ami halo ho Organizasaun Internasionál Marítima deteta ró ilegál lima. Ita lahatene sira rejistu iha ne’ebé no sira mós rejistu uza bandeira Timor-Leste nian,” Ministru me’e informa ba Agência Tatoli iha Parlamentu Nasionál, kinta ne’e.
Tamba ne’e, nia hateten, iha fulan rua ka tolu liubá nia hakerek karta pedidu ba Organizasaun Internasionál Maritima para kansela sira-nia rejistu, tanba se sira rejistu tiha tenke haruka ba pájina website IMO nian, entaun ekipa IMO mós konfirma kedas mai katak loos duni TL mak halo rejistu ka lae.
“Ita la rejistu ida tanba ita mós iha dekretu-lei ba rejistu navi nian maibé to’o agora ita seidauk rejista kompañia ne’e, maibé ita halo ona liña koordenasaun ho entidade balun atu buka tuir kompañia ida-ne’ebé halo rejistu ilegál ba ró sira husi nasaun seluk,” nia apela.
Notísia relevante : AMN deteta ró 39 halo atividade iha tasi uza bandeira Timor
Enkuantu nia informa entre ro lima ne’e barak liu husi Xina, nune’e pedidu ne’ebé nia halo haruka ba rejionál iha Tailandia, Embaixador Timor-Leste ba United Kingdom, no Embaixadór Timor-Leste ba Xina, maibé kona-ba sira-nia operasaun ita ita-nia territóriu nia seidauk hetan informasaun.
“Kona-ba sasán saida mak ró ilegál sira tula ne’e ha’u lahatene tanba to’o agora ita seidauk rejistu sira-ne’e. Tanba ne’e, komunikasaun la’o ona no IMO mós kansela rejistu ró sira-ne’e,” nia dehan.
Normalment,e Governu laiha kompeténsia fó sansaun ba ró ilegál sira-ne’e maibé buka mak kompañia ida uza Timor-Leste nia naran halo rejistu ilegál ne’e no sansaun ne’e IMO rasik mak sei fó.
Maibé, bainhira halo ona operasaun tama to’o ita-nia territóriu nasionál Marítima mak deteta ne’e, di’ak-liu kaer no prende ró sira-ne’e.
“Agora, ita halo esforsu buka hela kompañia ne’e tanba ida-ne’e krime transnasionál ona,” nia hateten.
Jornalista : Alexandra da Costa
Editór : Cancio Ximenes
