DILI, 26 setembru 2025 (TATOLI)—Autoridade Marrítima Nasionál (AMN) hafoin estabelese nia Kapitaun Portu iha Tibar no Dili, konsege deteta ró ilegál hamutuk 39 halo atividade iha tasi uza bandeira Timor.
“Autoridade Marrítima Nasionál depoizde tomada depose Kapitaun Portu Dili no Tibar, ita deteta hotu ona ró 39 ne’ebé uza bandeira ilegál Timor, nia navega iha tasi laran liuhusi ne’e bá Singapura,” Komandante Komponente Navál, Komodoro Higino das Neves hateten ba Jornalista sira, hafoin enserramentu ezersísiu Cooperation Afloat Readiness and Training (CARAT), iha Baze Komponente Navál, iha Hera, Sesta ne’e.
Nia dehan, hafoin deteta ró ilegál sira ne’e, AMN labele halo prosesu ba ró sira ne’e tanba hanesan serbisu inter-ministeriál, tanba ne’e presiza iha koordenasaun.
“Agora ita deteta, maibé atu ba kaer iha difikuldade, tanba Ministériu Transporte no Komunikasaun tenke serbisu atu justifika ró ne’e husi ne’ebé, lisensa iha ka lae tanba sira mak toma-konta hodi haree lisensa dokumentu para ita bele kaer. Buat sira ne’e dalaruma difikulta ita atu prosesa ró ida ba oin. Enkuantu husi ida-ne’e ita haree katak koordenasaun ladún di’ak iha inter-ministeriál, ne’ebé ami estabese sumária ida-ne’e,” nia tenik.
Notísia relevante : Índia kompromete apoia Komponente Navál ba formasaun militár
Komodoro dehan, bainhira situasaun ne’e kontinua maka ró ilegál tama iha Tasi Timor no sei fó ameasa ba Timor-Leste tanba bainhira koalia kona-ba ilegál ne’e kestaun ba seguransa nasionál afeta.
“Afeta ida mak nauk ó nia rikusoin, ida mak bele lori ai-moruk a’at mai fa’an, ó la hatene depois ita-nia joven konsumu estraga futuru jerasaun Timor. Portantu hotu-hotu ne’ebé ilegál signifika bele estraga Timor nia futuru, ne’e mak ita hein, ita fiar tanba ita-nia Governu kompromete atu hola ró, fiar katak tinan ida-ne’e bele hola ró para Komponente Navál halo nia kna’ar ho di’ak,” nia katak.
Jornalista : Natalino Costa
Editora : Julia Chatarina
