DILI, 01 Jullu 2025 (TATOLI)-Ministru Defeza, Donaciano do Rosário Gomes, hatete Índia kompromete apoia FALINTIL-Forsa Defeza Timor-Leste, liuliu Komponente Navál liga ba formasaun militár.
“Kontribuisaun signifikativa husi Governu Índia ba formasaun no kapasitasaun ba ofisiál sira husi Komponente Navál. Maske seidauk liuhusi akordu ofisiál, Índia hatudu vontade hakarak hametin liután kooperasaun ho Timor-Leste”, dehan ministru ne’ebé koñesidu ho naran Pedro Klamar Fuik ba jornalista sira hafoin simu vizita embaixadór Índia ba Timor-Leste, Shri Madan Kumar Ghildiyal, iha Ministeriu Defeza Fatuhada, tersa ne’e.
Governante ne’e hateten, vizita ne’e hametin liután relasaun diplomátika no kooperasaun. “Diplomata Madan Kumar Ghildiyal mai atu hametin liután relasaun bilaterál Índia no Timor-Leste hafoin vizita ofisiál Prezidente Índia, Smt. Droupadi Murmu, iha fulan-Agostu tinan 2024”.
Tuir governante ne’e relasaun Índia ho TL sai metin liután bainhira TL estabelese embaixada iha Índia. “Índia orgullu ho estabelesimentu nia embaixada iha Dili. Ida-ne’e signifika katak dezenvolvimentu ba ita-nia relasaun bilaterál entre Estadu rua sei di’ak liután, liu-liu iha setór defeza”, nia subliña.
Iha fatin hanesan, embaixadór Índia ba Timo-Leste, Madam Kumar Ghaildiyal, dehan vizita ne’e hametin liután relasaun diplomátika no kooperasaun entre Nasaun rua.
“Ha’u mai vizita Ministeriu Defeza atu ko’alia liu konaba hametin liután relasaun diplomátika no kooperasaun ne’ebé di’ak liután”, katak nia.
Nia fundamenta, relasaun diplomátika no kooperasaun ne’e sei kontinua, tanba Índia hakarak apoiu nafatin Timor-Leste ba futuru sai di’ak liután.
Notísia relevante: MD apresia Komponente Navál hahú dezenvolve-án
Jornalista : Natalino Costa
Editora : Rita Almeida
