SSM Vikeke rejista moras HIV-SIDA na’in-26
VIKEKE, 03 Outubru 2025 (TATOLI)—Diretór Servisu Saúde Munisípiu Vikeke, Aljacsono S. Maia informa Servisu Saúde Munisípiu (SSM) Vikeke daudaun ne’e rejista kazu tranzmisaun vírus HIV-SIDA hamutuk ema na’in-26 no husi númeru ne’e na’in haat-haat (4) mate.
“Kazu HIV-SIDA iha Munisípiu Vikeke totál hamutuk 26. Husi númeru ne’e ema na’in-16 mak dadaun ne’e sei iha faze asisténsia saúde, na’in-haat (4) mate no na’in-neen (6) fila bá família ne’ebé sei kontinua hetan tratamentu,” Aljacsono S. Maia ba TATOLI iha nia kna’ar fatin, Postu Administrativu Vikeke Vila, Munisípiu Vikeke, Sesta ne’e.
Notísia relevante: INCSIDA kontinua divulga transmisaun no prevensaun vírus HIV-SIDA iha Taiboko
Aljacsono hatutan husi númeru ne’e, rejistadu na’in-rua foun, na’in-ida transferidu husi Oekusi.
Tuir dadus husi Ministériu Saúde katak ema hamutuk na’in-500 mak infetadu ba kazu moras HIV-SIDA ne’ebé halai sees husi tratamentu. Tanba ne’e, bainhira halo relasaun seksuál tenke uza kondom atu evita moras HIV-SIDA.
“Ho ida-ne’e ha’u hakarak apela ba joven sira iha Munisípiu Vikeke, karik halo relasaun seksuál utiliza kondom ne’e importante,” nia apela.
Jornalista: Vitorino Lopez da Costa
Editór: Xisto Freitas da Piedade
