DILI, 03 Outubru 2025 (TATOLI)–Tribunál Judisiál Primeira Instánsia Dili, Sesta ne’e, halo rejulgamentu ba kazu omesídiu neglijente ne’ebé halakon Zizelma Maria Fátima Gonçalves nia vida.
Iha loron 13 Marsu 2025, MSDC lori motór xoke Zizelma Maria iha Loja Funan Buras nia oin, iha Delta 3.
Molok tama ba rejulgamentu ba prosesu ne’e, iha sala audiénsia, Juíz ba prosesu, José Gonçalves pronúnsia katak Tribunál Rekursu deside hodi halo rejulgamentu ba kazu omesídiu neglijente ho vitíma Zizelma Maria. Tanba ne’e, Tribunál Judisiál Primeira Instánsia halo rejulgamentu ba kazu ne’e.
“Rejulgamentu ne’e bazeia ba desizaun Tribunál Rekursu atu husu Ministériu Públiku atu arrola fali faktu foun ba kazu ne’e. Nune’e, ita kumpre ba desizaun Tribunál Rekursu no ohin ita halo rejulgamentu ,” Juíz José Gonçalves deklara.
Iha Prosesu ne’e, Asistente ba vítima Zizelma, Estaqui Guterres, rekere ba Tribunál atu rona sasin na’in-rua ne’ebé molok ne’e konsta ona iha nia Asistente nia rekursu ba Tribunál Rekursu.
Notísia relevante : Tribunál Rekursu deside rejulgamentu kazu Zizelma
Bazeia ba rekerimentu, Asistente Zizelma nian maka Ministériu Públiku (MP) liuhusi Prokuradór Rafael Gusmão mós solisita ba Tribunál katak nesesáriu duni atu rona sasin na’in-rua iha prosesu, nune’e bele halibur tan faktu balun ne’ebé nesesita ba kazu.
Iha sala julgamentu, Juíz José Gonçalves aseita no presiza rona duni sasin nia depoimentu ba prosesu ne’e.
Iha prosesu ne’e, Tribunál hahú ajenda hodi rona depoimentu husi Arguidu MSDC. Maibé, iha okaziaun ne’e arguidu MSDC hili direitu nonok durante prosesu ne’e.
Nune’e, Tribunál ba kedan rona sasin Nelia Maria Dolores Verdial no fó nia depoimentu ba Tribunál katak iha loron 23 Marsu 2025, tuku 20:30 kalan, vítima Zizelma bá halimar iha uma iha Delta 3.
Sasin lembra katak momentu ne’ebá, Zizelma konversa ho família, la to’o minutu 30, nia fila bá nia uma Delta 2 no iha dalan la kleur motór xoke nia.
Sasin hateten, Zizelma no sasin nia uma besik malu, estrada maka fahe de’it. Sasin deklara momentu ne’e nia la lori Zizelma to’o estrada, maibé la to’o kleur nia rona buat balun tarutu maka’as, nune’e nia halai bá haree, mótor mak soke Zizelma hodi monu pozisaun toba duku ulun ba a’as.
Sasin momentu ne’ebá kedan bá foti matebian nia telefone husi nia kalsa bolsu atu telefone ba nia família. Momentu ne’ebá, Zizelma nia maun sira (Zivo Verdial no Niquito Verdial) to’o kedan iha fatin akontesimentu.
Momentu ne’ebá, sasin husu ajuda ba karreta ida para iha oin, nune’e karreta na’in ne’e ajuda tula duni Zizelma bá Sentru Saúde Komoro.
Sasin deklara, momentu sira hasa’e Zizelma bá iha karreta laran, kaer nia liman laiha ona iis.
Nia dehan, hafoin sira tula tiha Zizelma bá karreta, nia (sasin) fila bá uma troka tiha faru tanba momentu ne’e nia hatais ropa uma nian, entaun nia fila bá troka ho nune’e nia ho nia alin bá kedan ho motór tuir Zizelma iha Sentru Saúde.
Maibé iha dalan família sira telefone katak doutór sira haruka Zizelma bá fali Ospitál Nasionál, nune’e sira bá tuir kedan iha ne’ebá.
Bainhira to’o Ospitál Nasionál, Nelia Maria tama duni bá sala emerjénsia hodi haree Zizelma no matebian momentu ne’e doutór sira fó tratamentu ba nia ne’ebé sasin sai tiha mai li’ur, iha de’it minutu balun sasin rona família fó hatene katak Zizelma hakotu ona iis.
Bainhira Tribunál konfirma tán faktu ba sasin, momentu sasin haree Zizelma monu ona iha estrada? Saida mak ita harree! sasin hateten, nia haree katak iha duni karreta ida para besik Zebra Cross no sasin mós momentu haree mótór ida monu iha estrada klaran.
Bainhira Tribunál konfirma faktu katak Zizelma antes hetan asidente motór soke ne’e, nia (zizelma) la’o liuhusi Zebra Cross ka lae? sasin ne’e hateten, nia la haree diretamente katak momentu ne’e matebian la’o iha Zebra Croos, maibé sasin haree fali liuhusi CCTV ne’ebé ema tau iha facebook katak matebian la’o duni iha Zebra Croos.
Hafoin rona tiha depoimentu sasin nian, Estaqui Guterres husu ba Tribunál atu notifika mós ba Loja Funan Buras no Toto Bola atu loke CCTV hodi haree kona-ba faktu sira katak Zizelma la’o duni iha Zebra Cross ka lae.
Nune’e, Tribunál liuhusi Juíz prosesu José Gonçalves aseita no Segunda (06/10) hodi notifika Loja Funan Buras no Toto Bola ne’ebé nu’udar fatin akontesimentu ba kazu omesídiu neglijente ne’ebé halakon Zizelma nia vida.
Audiénsia Julgamentu ne’e prezide husi Juíz José Gonçalves, MP reprezenta husi Prokuradór Rafael Gusmão, matebian nia asistente mak Estaqui Guterres no arguidu hetan asisténsia legál husi Advogadu Privadu Américo.
Jornalista : Natalino Costa
Editora : Julia Chatarina
