VIKEKE, 04 Outubru 2025 (TATOLI)—Primeiru-Ministru (PM), Kay Rala Xanana Gusmão, Sábadu ne’e, lansa fatuk-inan dahuluk ba ponte Uelolo, ne’ebé lokaliza iha Aldeia Uma-Bo’o, Suku Luka, Postu Administrativu Vikeke, Munisípiu Vikeke.
Iha serimónia lansamentu ne’e, Xefe Governu solisita povu Vikeke labele impede obra referida, tanba akontese iha fatin balun mosu impedimentu obra sira labele implementa ho di’ak.
Iha fatin hanesan, Ministru Obra Públika, Samuel Marçal rekoñese ponte Uelolo durante ne’e sai problemátiku tebes, afeta tebes ba populasaun sira-nia uma, toos no natar.
“Ohin ita bele lansa ona ponte ida-ne’e. Ha’u husu ba povu Luka koopera ho empreza. Ba joven sira-ne’ebé karik presiza servisu, ko’alia didi’ak ho empreza hodi envolve hada fatuk atu hetan osan ruma, maibé labele halo problema. Ita espera ponte ne’e halo tinan ida ho balun bele ramata,” nia hato’o.
Notísia relatavante: https://tatoli.tl/2025/09/12/autoridade-luka-kontinua-solisita-governu-konstrui-ponte-uelolo/
Aleinde ne’e, Prezidente Autoridade Munisípiu (PAM) Vikeke, Francisco Cruz Simões de Gonzaga Soares hato’o agradesimentu ba Primeiru-Ministru halo lansamentu ba ponte Uelolo ne’ebé sai preokupasaun ba povu Vikeke tomak.
“Ami Vikeke orgullu tanba Primeiru-Ministru mai ami-nia fatin hodi hatur fatuk ba ponte Uelolo ne’ebé durante ne’e sai preokupasaun povu Vikeke. Lansamentu ida-ne’e indika katak dezenvolvimentu hahú tama iha Munisípiu Vikeke,” nia hato’o.
Projetu ponte Uelolo ne’e ho númeru kontratu SSS/118/MOP-2025, superviziona husi Ministériu Obra Públika (MOP), sei gasta orsamentu totál hamutuk $4.398.863,24, responsabiliza husi empreza Nananiu Engineering & Construction Company Unipessoal, Lda, ho durasaun servisu loron 365. Tuir dadus, populasaun Luka ne’ebé hela pertense ba área Uelolo ho totál hamutuk 2.455.
Tuir observsaun TATOLI, populasaun no autoridade sente haksolok ho lansamentu ne’e tanba Governu responde ona populasaun sira-nia preokupasaun ne’ebé durante ne’e enfrenta problema ba mota Uelolo.
Xanana motiva joven Vikeke kontribui ba dezenvolvimentu
Primeiru-Ministru (PM), Kay Rala Xanana Gusmão motiva joven Vikeke-oan sira atu buka aprende hodi kontribui ba prosesu dezenolvimentu rai doben Timor-Leste.
“Joven Luka no Vikeke imi tenke prepara aan no buka aprende barak. Ha’u uluk antes sai polítiku, ha’u operáriu (badaen) otél Timor halo kuartu tolu iha andár parte leten nian ne’e ha’u-nia liman fatin. Ikus-ikus ne’e joven sira hakarak mak ezije no ezije de’it maibé lakohi aprende,” Xanana haktuir.
Nia husu baa jove sira tenke treina aan agora, la’ós hein de’it husi ema seluk tanba hein de’it husi ema atu bolu ba servisu, maibé servisu lahatene. Ida-ne’e, ema dehan liafuan kazuál tanba bolu malu tama servisu tanba votu.
Xanana informa bainhira ema bolu bá asina kontratu, maibé la hatene servisu, ida-ne’e estraga de’it povu nian osan.
Rekomenda MOP akompaña prosesu konstrusaun ponte Uelolo
Iha parte seluk, komunidade Aldeia Uma-Bo’o, Suku Luka, Postu Administrativu Vikeke Vila, Munisípiu Vikeke rekomenda ba Ministériu Obra Públika (MOP) atu akompaña empreza implementadór konstrusaun ponte Uelolo to’o konkluidu.
“Ponte Uelolo Primeiru-Ministru lansa ona, maibé ami komunidade Aldeia Uma-Bo’o hakarak rekomenda ba Governu kontinua akompaña prosesu konstrusaun ne’e,” abitante Suku Luka, Estevão Castelo dehan ba TATOLI.
Estevão haktuir kuandu udan komunidade labele liu mota no lori moras ruma mós labele.
Iha fatin hanesan, joven Romário Vieira Baptista informa durante ne’e komunidadde Luka liuliu komunidade Uma-Bo’o afetadu tebes mota Uelolo no ponte liga Same no Manatuto.
“Kuandu lansa ona obra ne’e tenke hahú ona servisu no empreza implementadora tenke foku ba servisu. Karik servisu lala’o MOP tenke superviziona, atu obra ne’e la’o to’o hotu,” nia sujere.
Jornalista: Vitorino Lopez da Costa
Editór: Xisto Freitas da Piedade
