VIKEKE, 12 Setembru 2025 (TATOLI)—Autoridade Suku Luka, Postu adiministrativu Vikeke Vila, Munisípiu Vikeke kontinua solisita Governu liuhusi Ministériu Obra Públika (MOP) konstrui ponte Uelolo tanba kuaze tinan haat resin difikulta abitante sira-nia movimentu.
Xefe Suku Luka, Manuel Gomes haktuir durante ne’e abitante Suku Luka ne’ebé hela iha mota Uelolo sorin, tempu udan sai terus tanba sira liu difísil ultrapasa mota.
Notísia relevante: https://tatoli.tl/2025/01/21/mota-uelolo-difikulta-pesoal-saude-viqueque-atende-kazu-emerjensia/
“Problema mota Uelolo ne’e ita-nia komunidade enfrenta tinan hira ona, maibé MOP seidauk konstrui fali ponte hodi komunidade asesu. Tanba ne’e, ha’u nu’udár autoridade lokál hakarak husu MOP konstrui ona ponte hodi fasilita movimentu ema ho transporte,” Manuel Gomes hateten ba jornalista sira iha Suku Luka, Sesta ne’e.
Autoridade Suku Luka ne’e subliña problema ida-ne’e nia hato’o beibeik ona ba ministériu relevante maibé to’o ohin loron seidauk iha solusaun.
Notísia relevante: https://tatoli.tl/2024/02/19/tinan-nee-mop-promete-normaliza-mota-no-konstrui-ponte-welol/
Iha fatin hanesan, Administradór Postu Vikeke Vila, Leopoldo da C. Alves informa ponte Uelolo sai preokupasaun tebetebes ba abitante sira iha Uelolo liuliu iha tempu udan tanba tenke ultrapasa mota.
“Ha’u tun direta beibeik ba haree ita-nia komunidade Uelolo. Situasaun mota ne’e prejudika liu ba ita-nia komunidade iha tempu udan. Mota ne’e mós estraga daudaun eskola ensinu báziku Uelolo. Preokupasaun sira-ne’e Xefe Suku Luka no juventude mós hato’o beibeik ba ha’u, nune’e ha’u sempre pasa preokupasaun sira-ne’e ba autoridade munisípiu no MOP munisípiu no nasionál hodi haree asuntu ida-ne’e. Ha’u fiar katak Governu sei la taka matan tanba ha’u sempre komunika ba sira,” nia hato’o.
Nia sujere, Governu buka solusaun ba ponte Uelolo tanba ponte referidu la’ós de’it ba komunidade Luka, maibé povu Vikeke tomak.
Tuir dadus, populasaun hela iha área Uelolo hamutuk na’in-748, totál uma-kain hamutuk 154.
Jornalista: Vitorino Lopez da Costa
Editór: Xisto Freitas da Piedade
