Tinan ne’e, MOP promete normaliza mota no konstrui ponte Welolo

VIQUEQUE, 19 fevereiru 2024 (TATOLI)- Ministru Obra Públiku (MOP), Samuel Marçal, promete bainhira udan para hahú halo normalizasaun ba mota hodi bele konstrui ponte welolo ne’ebé lokaliza iha aldeia Uma Boot, suku Luca, postu Viqueque Vila, Munisípiu Viqueque.

“Udan para hahú halo normalizasaun ba mota no hari’i fila ponte foun,  maibé ba futuru presiza halo estudu ida kle’an di’ak tanba ha’u haree mota ida ne’e uniku iha Timor tanba mota hotu-hotu nia ain bá to’o tasi, uniku mota welolo ain laiha, nune’e seidauk hatene bee hala’i ba ne’ebé. Tanba ne’e ita presiza halo estudu ba mota welolo”, hatete Ministru ne’e hafoin observa direta ba mota Uelolo, iha postu Viqueque Vila, ohin.

Notísia relevante: Autoridade Viqueque husu Governu sentrál rezolve ponte Welolo kotu

Governu liuhosi MOP prevee ona orsamentu  hodi konstrui ponte Uelolo, hodi fasilita movimentasaun ba abitante

“Tinan ida-ne’e ami  prevee ona orsamentu purvolta millaun $1 ba normaliza no konstrui mota welolo, maibé orsamentu ida-ne’e seidauk  fixa loos tanba presiza halo levantamentu maka foin orsamentu loos”, Governante ne’e afirma.

Daudaun ne’e, ekipamentu pezadu husi empreza JONIZE unipesoál Lda destaka ona iha mota Uelolo, maibé udan halo mota korrente boot ne’ebé afeta ba normalizasaun no konstrusaun.

“Ita-nia empreza la’ós la servisu, maibé mota mak sei boot. Karik udan para ita-nia empreza hahú fali servisu hodi halo normalizasaun”, afirma Ministru Samuel.

Observa Estrada Lugato’i

Entretantu, MOP ho ekipa enjiñeiru sira hosi governu no empreza Don Boaventura, segunda ne’e, observa direta  estrada Lugato’i ne’ebé lokaliza iha suku Caraubalu, postu Viqueque Vila, munisípiu Viqueque.

“Ohin, observa dalan Lugatoi atu foti desizaun. Karik, ida-ne’e (Estrada Lugato’i) labele ita tenke haree mós dala alternativu seluk. Maibé ha’u haree ona no tékniku sira dehan bele rezolve kestaun dalan Lugato’i”, Ministru ne’e hateten

Governante ne’e hatutan, orsamentu ba konstrusaun Estrada Lugato’i  seidauk prevee tanba orsamentu multi anuál, katak hafoin tekniku sira haree kondisaun real mak bele deside no orsamenta.

“Ohin ha’u mós uza kamera drone hodi  haree dalan alternativu ne’ebé  loke  husi aldeia  Buanurak to’o iha eskola sekunáriu 4 setembru. Tanba xefe suku Caraubalu informa ba ha’u katak dalan alternativu ne’e ba futuru konstrui ospitál munisipál no edifísiu kamara munisipál, maibé ita sei haree iha tinan 2025. Tanba agora ita foku ba estrada Lugato’i”, Governante ne’e afirma.

Hafoin haree estrada Lugato’i governante ne’e kontinua ba observa dalan urbana ida kotu iha área Boromatan suku Caraubalu no dalan diresaun Viqueque ba postu Uatulari.

“Ha’u  mós haree direta ba dalan urbana  sira-ne’ebé iha kapitál Viqueque Vila oinsa maka ita bele hadi’a tanba kondisaun aat tebe-tebes. Ha’u espera katak iha tinan ida-ne’e ita bele komesa hadi’a dalan urbana sira-ne’e”, nia promete

Ikus nia husu autoridade komunitária sira iha munisípiu Viqueque bainhira empreza responsavél sira hala’o servisu labele iha impedementu ruma no autoridade sira tenke akompaña.

Iha fatin hanesan, responsavél empreza Don Boaventura Unipesoál Lda, Victor Mintura, hateten, daudaun ne’e empreza hahú servisu iha mota hodi hadi’a bee dalan  atu bee labele sobu estrada Lugato’i.

“Ami hahú kee barreira nian fatin hodi halo protesaun iha mota no ami buka hela bee dala tanba rai hala’i tun ba mota ne’e kauza husi bee. Nune’e ami agora buka bee dalan hodi hein dezeñu husi Governu”, nia hato’o.

Notísa relevante:MOP ajudika direta Empreza Don Boaventura reabilita estrada Lugatoi ne’ebé kuaze kotu

Jornalista : Vitorino Lopes da Costa

Editór       : Florencio Miranda Ximenes