VIQUEQUE, 17 fevereiru 2024 (TATOLI)—Sekretáriu munisípiu Viqueque, Teotónio Sarmento da Silva, husu Governu sentrál atu rezolve lalais ponte Welolo ne’ebé antes ne’e sobu ona tanba kotu maibé to’o agora seidauk monta ponte seluk.
“Iha momentu empreza sobu ponte Welolo, Administradór munisípiu Viqueque hasai despaisu atu labele sobu uluk ponte atu povu bele uza provióriu lai. Depois konstrui ona ponte foun maka bele sobu, nune’e la prejudika abitante. Ha’u husu Governu sentrál atu rezolve lalais ona atu povu bele asesu tanba daudaun mota Welolo difikulta populasaun sira-nia movimentu,” Teotónio Sarmento da Silva, informa ba jornalista sira iha ponte Welolo, sábadu ne’e.
Notísia relevante : Abitante iha suku Luca Viqueque hala’o serimónia kulturál ba mota Welolo
Nia haktuir, abitante sira daudaun ne’e hasoru difikuldade bainhira atu halo movimentu hodi lori produtu bá fa’an iha merkadu no halo atividade seluk.
“Empreza sobu hodi halo foun, maibé agora abandona, nune’e munisípiu Viqueque husu atu Governu responde nesesidade povu. Daudaun ita haree mota halai tuir estrada hodi estraga abitante sira-nia hela fatin. Tuir loloos ponte sobu ona ne’e konstrui fali ona ponte seluk no taka ona bee dalan ne’ebé halai tuir estrada atu povu labele sai vítima hela de’it. Ponte ne’e kompeténsia nasionál la’ós munisípiu,” Sekretáriu administrasaun munisipál relata.
Iha sorin seluk, Abitante hosi aldeia Uma-boot, suku Luca, postu Viqueque Vila, Cirílio Guterres, sente triste tanba bainhira laiha ponte, mota estraga populasaun lokál nia hela fatin.
“Ami sai terus tanba mota Welolo. Ami sai bá fatin ruma susar tanba ponte ema sobu tiha ona, nune’e bainhira mota tun ami labele la’o bá fatin ruma. Tanba ne’e, ami husu ba Governu tau-matan ba ami hodi konstrui ponte no normaliza mota,” nia hato’o.
Nune’e mós, Abitante lokál, Maria Almeida Viegas, haktuir, estrada ibun ne’ebé besik ponte daudaun ne’e nakfikak sai mota no halo uma-kain 31 ne’ebé hela besik parte ne’e nakonu ho bee.
“Tinan-haat ona ami hela iha mota laran, foin lalais iha tinan 2021 ne’e maka mota halai tuir tiha mai estrada no estraga uma sira-ne’e tanba bee nakonu,” nia hato’o.
Hatan ba preokupasaun ne’e, Diretór Servisu Obra Públika munisípiu Viqueque, Mário do Rego, hateten, Governu liuhosi ministériu tutela orienta ona empreza JONIZE, UNIP Lda hodi sobu ponte Welolo ne’ebé nakonu ho sedimentasaun no daudaun empreza sei hein hela dezeñu ponte ho kontratu hosi Governu maka foin hahú serbisu.
“Nune’e ita hein bainhira mak Governu entrega dezeñu no kontratu ba empreza ne’e hodi sira hahú halo ona serbisu tanba empreza sira destaka ona ekipamentu pezadu iha terrenu no sei tau iha mota Welolo,” nia tenik.
Jornalista : Vitorino Lopes da Costa
Editora : Julia Chatarina
