Ministru Honório husu traballadór tenke hatudu étika, identidade no dignidade iha servisu fatin

DILI, 02 Outubru 2025 (TATOLI)—Ministru Ensinu Superiór Siénsia no Kultura (MESSK), José Honório da Costa Pereira Jerónimo husu traballadór sira tenke hatudu étika, identidade no dignidade iha servisu fatin.

“Traballadór ida kuandu servisu iha fatin balun tenke hatudu étika, identidade no dignidade. Tanba ita haree katak timoroan barak mak servisu iha rai-li’ur, dalaruma mosu buat balun ne’ebé ita la espera maibé akontese. Entaun, semináriu ida ohin ne’e importante tebes ba ita-nia traballadór sira,” Ministru José dehan iha semináriu internasionál kona-ba “Esperiénsia timoroan nian kona-ba migrasaun traballadór étika, identidade no dignidade”, ne’ebé hala’o iha Sentru Konvensaun Dili (CCD-sigla portugeza), Kinta ne’e.

Ministru Jerónimo dehan liuhosi semináriu ne’e bele motiva no enkoraja traballadór sira oinsá aumenta esperiénsia no koñesimentu traballadór sira-nian atubele kontribui ekonomia ba nasaun Timor-Leste.

Iha fatin hanesan, Vise Primeiru-Ministru no Ministru Koordenadór Asuntu Ekonomia no Ministru Turizmu Ambiente, Francisco Kalbuadi Lay hateten ne’e oportunidade di’ak ba traballadór timoroan atubele buka moris hodi sustenta família.

“Maibé mós dezafiu no difikuldade oioin ne’ebé la husik ita. Liuhosi dezafiu hirak-ne’e dalan saida mak ita bele buka atu hadi’a liután ita-nia maun-alin no joven ne’ebe namkari iha fatin oioin. Entaun, liuhosi semináriu ne’e la’ós fahe koñesimentu no espesiénsia ba-malu de’it maibé atu reflete kona-ba joven no família timoroan ne’ebé buka moris hodi sustenta futuru ne’ebé di’ak ba sira-nia moris no ba família,” Lay dehan.

Ministru Kalbuadi esplika migrasaun traballadór ne’e kle’ur ona sai nu’udár vida sósiu-ekonómiku tanba traballadór ne’ebé servisu iha rai-laran ka rai-li’ur la kontribui de’it ekonomia ba nasaun ne’ebé sira servisu ba, maibé fó kontribuisaun ne’ebé boot ba dezenvolvimentu ba Timor-Leste.

“La’ós de’it transfere osan ba família no nasaun maibé mós halo transferénsia abilidade iha sira-nia servisu ba. Maski nune’e, iha mós dezafiu, difikuldade no kompleksidade lubuk ida hanesan traballadór soke morru legál, enfrenta barreira língua no barak mak susar adapta kultura foun, defaktu balun tenke fila tanba moras,” nia konklui.

Iha semináriu internasionál ne’e hetan partisipa hosi estudante universitáriu no mós dosente sira.

Jornalista: Osória Marques

Editór: Xisto Freitas da Piedade