VIKEKE, 05 Outubru 2025 (TATOLI)—Primeiru-Ministru (PM), Kay Rala Xanana Gusmão hamutuk autoridade Munisípiu Vikeke lansa fatuk-inan dahuluk ba projetu reabilitasaun estrada husi Rai-hun, Suku Luka, Postu Administrativu Vikeke Vila liga bá Postu Administrativu Lakluta, ho distánsia kilómetru 14.
Iha lansamentu ne’e, PM Xanana hateten lansamentu estrada ne’e nu’udár devér husi Governu hodi fó espasu ba povu atu lori produtu ba fa’an iha Dili.
“Estrada ne’ebé ohin ita lansa ne’e, la’ós prezente maibé ida-ne’e devér Governu nian hodi kria kondisaun estrada sira-ne’e ba povu Lakluta,” Kay Rala Xanana Gusmão hateten iha ámbitu lansamentu fatuk-inan dahuluk iha Postu Lakluta, Domingu (05/10).
Notísa relevante: https://tatoli.tl/2025/09/15/governu-kontrata-ona-empreza-rua-reabilita-estrada-luka-liga-ba-postu-lakluta/
Xefe Governu husu ba povu Lakluta katak bainhira estrada hotu tenke lori produtu lokál ba Dili hodi hetan osan.
“Ha’u lori povu Lakluta nia naran husu empreza halo estrada ho di’ak no kualidade,” nia sujere.
Iha fatin hanesan, Ministru Obra Públika (MOP), Samuel Marçal dehan obra ne’e uza povu nia osan, tan ne’e nia hakarak lori kontratu ne’e asina iha povu nian oin hodi povu sai sasin ba kontratu entre governu no empreza sira.
“Nune’e ferik-katuas no joven sira bele sente katak obra ne’e ita-nian, halo ba ita no ita mak uza. Ne’ebé, labele hanesan iha fatin seluk ne’ebé ezije estrada depoiz ita halo, sira mak halo fali impedimentu,” governante ne’e fó hanoin.
Entretantu, projetu ne’e Ministru Obra Públiku (MOP), Samuel Marçal asina direta ho empreza responsavel rua. Ba reabilitasaunn Lot A, STA 0+00-STA 7+00, kontratu SSS/135/MOP-2025, sei gasta $4.000.215,67, husi Kimberlie konstrusaun Unip, Lda. Enkuantu, ba Lot B, STA 7+00-STA 13+922.67, kontratu SSS/136/MOP-2025, sei gasta $3.494.938,50, responsabiliza husi Empreza Hoven II Unip, Lda, durasaun servisu tinan ida, hahú 04 Outubru 2025 sei ramata iha 04 Outubru 2026.
Obra ne’e lansa husi PM Kay Rala Xanana Gusmão, akompñadu Ministru Samuel Marçal, Autoridade Munisípu Vikeke, Komandante Polísia Nasionál Timor-Leste (PNTL) Munisípiu Vikeke, Autoridade Lakluta no hetan partisipa másimu husi populasaun Postu Lakluta.
Jornalista: Vitorino Lopez da Costa
Editór: Xisto Freitas da Piedade
