OEKUSI, 06 Outubru 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, promete sei koordena ho Ministériu Justisa atu hasa’e kuota ba númeru atendimentu pasaporte iha Rejistu Sívil Notariadu Oekusi.
“Númeru atu prodús pasaporte kada loron ne’e, ki’ik tebes, tanba bazea Ministériu Justisa nia desizaun mai Oekusi. Maibé, nu’udar Prezidente Autoridade, ha’u sei hakerek karta ida ba Ministru, atu konsidera hodi aumenta númeru pasaporte ba Oekusi-oan, tanba semana ida simu de’it ema na’in-20, entaun ami sei aprezenta rasionalidade ida, tanba ita presiza. Ha’u sei hakerek karta nune’e bele aumenta, se loron ida mak simu ema na’in-50, ne’e di’ak liután, tanba konstribui mós taxa ba kofre Estadu,” nia hateten, iha Oekusi, ohin.
Notísia relevante:Fornesimentu materiál ba notariadu Oekusi sei gasta rihun $206-resin
Tuir nia, tanba Oekusi besikliu fronteira, uluk Governu fasilita ho pase-fronteira (border-pass), maibé Oekusi-oan sira balun uza dokumentu ne’e viajen liu fali kilometru-10, tuir loloos border-pass ne’e uza ba vizita família iha oras balun de’it lahanesan ho pasaporte, no balun hetan kapturasaun iha fronteira no balun hetan kaptura iha rai bo’ot Indonézia tanba uza de’it border-pass.
“Ne’e razaun ita sei husu Ministru Justisa atu konsidera, maibé primeiru ita sei hadi’a lai ita-nia mákina sira iha notariadu, RAEOA iha kompeténsia no obrigasaun nune’e bele finansia fasilita ba ekipamentu fasilidade sira-ne’ebé bele ajuda ita-nia desizaun ne’e,” nia dehan.
Notísia relevante:MJ promete rezolve problema emisaun dokumentu iha notáriadu Oekusi
Iha biban ne’e, Diretór Diresaun Terra Propriedade no Notariádu Oekusi, José Ase Neno Colo, hateten, durante ne’e sidadaun barak hato’o protestu beibeik ba serbisu notariádu Oekusi, tanba kouta ki’ikliu.
“Husi nasaionál mak fó limitasaun, la’ós husi Autoridade RAEOA, maibé husi Diresaun Nasionál Rejistu Notariádu mak limita tanba fó ita-nia kuota ne’e, semana ida simu de’it ema na’in-15 to’o 20 de’it mak bele trata pasaporte, entaun ida-ne’e mak problema ida, ba sidadaun sira iha Oekusi hato’o protest beibeik, ne’e mak foin daudaun ha’u relata ona ba Autoridade RAEOA karik iha posibilidade koordena ho Diresaun Jerál Serbisu Notariádu Nasionál, atu hasa’e kuota uitoan, tanba joven no inan-aman iha Oekusi barak mak laiha pasaporte, entaun difikulta atu vizita família iha sorin,” nia hateten.
Notísia relevante:Janeiru-fevereiru 2023, Notariadu RAEOA kontribui rihun $8 ba kofre Estadu
Jornalista: Abílio Elo Nini
Editór: Rafael Ximenes de A. Belo
