OEKUSI, 03 Outubru 2025 (TATOLI) – Autoridade Rejiaun Administrativa Espesiál Oekusi Ambeno (RAEOA), lideradu Régio da Cruz Salu, aloka verba ho montante rihun $206,372.00 husi Orsamentu Jerál Estadu (OJE) 2025 nian, atu fornese materiál hanesan livru, blanko sertifikadu, Billete Identidade (BI) no fasilidade seluktan atu halo melloria serbisu iha Diresaun Terra, Propriedade no Konservatóriu Rejistu Sívil Notariadu Oekusi.
Tanba tuir Prezidente Autoridade RAEOA, Régio da Cruz Salu, katak presiza fó prioridade ba serbisu notariadu, nune’e bele garante dokumentu ba sidadaun hotu iha Oekusi, tanba tinan barak ona, dokumentu sira trata ho provizória de’it.
“Ne’e kompromisu ida, atu avansa ezekusaun orsamentu 2025 nian, tanba antes ha’u mai, prosesu ne’e la’o ona. Purtantu, ha’u la’ós halo eskrutinizasaun maibé konsiente katak, keta prosesu ne’e tuir ona lei ne’ebé regula ka la’e, maibé bainhira ha’u haree hotu, prosesu ne’e loos, transparente, no ha’u tenke asina lalais, tanba serbisu sira iha notariadu no terra, propriedade esensiál tebes, tanba komputadór balun laiha, entaun ne’e ita prioritiza no aprova, sistema imprime kartaun billete identidade, no dokumentu importante seluktan,” nia dehan iha Oekusi, ohin.
Notísia relevante:MJ promete rezolve problema emisaun dokumentu iha notáriadu Oekusi
Tuir nia, polítika ne’e atu kumpre minutas ne’ebé propoin ona husi entidade tuteladu RAEOA, Primeiru-Ministru Kay Rala Xanana Gusmão, katak fulan tolu tenke rezolve sasán sira-ne’e.
“Agora ita la’o de’it, ha’u labele la’o sai husi minutas ne’ebé Primeiru-Ministru fó mai, atu ezekuta iha mandatu fulan tolu, ne’ebé ha’u asina no aprova ona iha rezultadu konkursu públiku kompañia Grafika Nasionál Unipesoál Lda mak sai vensedór atu fornese ho nia valór rihun $206,372.00, atu fornese materiál ba diresaun rua ne’e,” nia katak.
Notísia relevante:PM Xanana atribui prioridade neen ba PA RAEOA ezekuta durante fulan tolu
José Ase Neno Colo, nu’udar Diretór Diresaun Terra, Propridade no Konservatóriu Rejistu Sívil Notariádu Oekusi orgullu tanba durante ne’e emite dokumentu ba sidadaun sira ho temporáriu de’it.
“Aprovasaun ne’e nesesáriu, tanba durante ne’e ita emite dokumentu barak ezemplu ita halo dokumentu rejistu moris, mate, kaben, depois emite billete identidade, maibé kuaze dokumentu sira-ne’e ita fó temporáriu de’it, surat-tahan mutin de’it, tan ne’e mak dokumentu sira-ne’e durante durante tinan ida ona laiha orijinál, ne’e mak tinan kotuk iha propoin verba iha PAA 2025 kuaze rihun $200, grasa Deus, fulan kotuk husi nasionál mai hamutuk ho tékniku sira iha RAEOA hodi halo konkursu públiku no agora iha ona rezultadu finál,” nia hateten.
Tanba ne’e, dirijente ne’e, ho esperansa katak, iha Outubru ne’e nia laran, Prezidente Autoridade RAEOA bele selebra ona kontratu empreza nune’e materiál ne’ebé atu fornese bele oferese ona.
Tanba bazeia orientasaun husi Diretór Jerál Rejistu Sívil Notariadu Nasionál, hateten katak, iha 2026 sei implementa lei emulmatus, katak dokumentu sira-ne’ebé hasai husi Konservatóriu Rejistu Sivíl Notariádu Oekusi, sei selu taxa ba kofre Estadu.
“Bainhira sidadaun hotu selu ona, entaun ita tenke fó dokumentu orijinál. Tan ne’e, mak ita ejize ba kompañia ne’ebé manán ona tenderizasaun (konkursu) ne’e, tenke aselera atu sosa materiál sira-ne’e, antes tama ba Janeiru 2026, materiál sira-ne’e bele to’o ona Oekusi atu utiliza ba serbisu,” nia propoin.
Notísia relevante:Fasilidade atendimentu iha Rejistu Sívil Notariadu RAEOA presiza manutensaun
Jornalista: Abílio Elo Nini
Editór: Rafael Ximenes de A. Belo
