BOBONARU, 06 Outubru 2025 (TATOLI) – Empreza Biasale Unipesoál Lda. hahú implementa projetu rekonstrusaun sala maternidade iha Sentru Saúde Komunitária (SSK) iha Kailaku, iha munisípiu Bobonaru.
Obra ne’e implementa liuhusi Planu Dezenvolvimentu Integradu Munisipál (PDIM) 2025 ho orsamentu poupansa hamutuk $131.971,65.
Enjeñeiru husi empreza Biasale Unip Lda., Aniceto do Carmo, konfirma obra ne’e komesa iha fulan-Setembru no daudaun progresu konstrusaun fizíku foin atinje 10%.
Nia garante sei ezukuta obra ne’e ho durasaun kontratu fulan haat bainhira la hetan impedimentu husi klima.
“Ami hada tiha fondasi, agora kontinua harii nia ai-riin hotu mak foin tau sinta okos. Ami kontinua serbisu, se ita hare ba klima di’ak hela, udan laiha, ita bele garante to’o Dezembru hotu. Maibe, klima ne’e dalaruma la to’o iha ne’ebá udan mai ona, entaun ita labele halo buat ida, ami tenke aumenta nia tempu uitoan hodi finaliza”, nia informa ba jornalista sira, ohin.
Xefe Sentru Saúde Komunitária Kailaku, Marçal Barros Soares, dehan liuhusi obra ne’e bele fasilita pesoál saúde sira melora prestaun saúde ba inan isin-rua ne’ebé atu partu.
“Ami durante ne’e hein hela obra ida-ne’e, tanba presiza sala maternidade. Durante ne’e ami husu hela ema la tau-matan, foin lalais ne’e mak fó mai. Ne’ebé ita rasik haree iha mudansa, tanba antes ne’e ami atende iha fatin ida”, dehan.
Instalasaun saúde foun ne’e sei fó atendimentu ba inan isin-rua sira husi husi suku Meligo, Manapa, Atuadara, Gulolo, Genulai, Purugua no Da-udu.
Notísia relevante: AMB uza orsamentu poupansa hodi implementa projetu foun rua
Jornalista: Sergio da Cruz
Editora: Maria Auxiliadora
