DILI, 06 Outubru 2025 (TATOLI)—Prezidente Autoridade Munisípiu Dili (PAM), Francisco dos Santos, husu ba vizitante jardín iha sidade Dili atu iha konxiénsia tanba jardín ba labarik sira hodi halimar, la’ós parajen transporte.
“Iha jardín ne’e la’ós fatin para ba tuur hemu tua iha-ne’ebá hodi lanu no baku tun-baku sa’e. Ida-ne’e mak ami sei kontrola maibé ita sei servisu hamutuk ho PNTL para halo kontrolu ba jardín sira,” nia dehan ba TATOLI iha nia kna’ar fatin, Matadouru, Dili, Segunda ne’e.
Notísia relevante: Funsionáriu AMD limitadu hodi kontrola jardín sira iha Dili
PAM Dili haktuir hanesan jardín BJ Habibie iha-ne’ebá fatin labarik sira ba halimar maibé karreta motór mak tama entaun labarik sira halimar ladi’ak, dalaruma labarik sira hetan dezastre.
“Ita bandu ona no parte husi PNTL sira mós ba avizu ona. Ita mós sei tau kuadru avizu ida iha-ne’ebá tanba ha’u haree jardín Faról no Motael fatin refresing nian maibé iha ema balun estraga ambiente,” nia haktuir.
Tuir nia katak jardín ne’e la presiza koloka seguransa tanba jardín ne’e fatin ne’ebé ema enjoy.
“Animál mak ita tenke tau seguransa hodi haree animál tama jardín. Maibé, ema mak iha jardín entaun AMD sei la tau seguransa. Tanba ne’e presiza ema-nia konxiénsia hodi kontribui ba jardín moos, furak no ijiene no hadomi ambiente,” Francisco informa.
Jornalista: Osória Marques
Editór: Xisto Freitas da Piedade
