DILI, 07 Outubru 2025 (TATOLI)—Autoridade Suku Fatulia, Postu Administrativu Venilale, Munisípiu Baukau, konsidera kompetisaun entre suku importante tanba sei motiva serbisu estrutura suku iha baze.
Xefe Suku Fatulia, Angelino Moises Pereira ko’alia kestaun ne’e aposta ba Governu liuhusi Ministériu Administrasaun Estatál (MAE) ne’ebé sei realiza kompetisaun iha suku bazeia ba lei suku numéru 9/2016 no prenxementu 18 livru.
“Ita prepara aan hela maibé la’ós tanba tenke tuir kompetisaun mak ita implementa serbisu administrasaun no finansa sira-ne’e,” Xefe Suku Fatulia informa ba TATOLI liuhosi telefónema, Tersa ne’e.
Notísia relevante: MAE introdús matadalan antes hahú kompetisaun entre suku iha Baukau
Tuir nia katak kompetisaun ne’e relevante tanba liuhosi kompetisaun ne’e bele enkoraja, motiva estrutura suku sira nune’e hala’o funsaun tuir kna’ar no responsabilidade.
Angelino Moises argumenta Suku Fatulia sei tama iha kritéria ne’ebé komisaun fó-sai maibé kona-ba valór fila ba avaliadór sira mezmu kompetisaun ne’e relasiona ho ezekusaun serbisu iha suku nian.
Suku Fatulia hala’o kooperasaun serbisu mós ho parseiru dezenvolvementu sira hanesan United Nations Development Programa (UNDP), Organizasaun Naun Govermentál ne’ebé eziste iha Baukau hanesan PRADET, ALFELA no seluk tan ne’ebé bazeia mós ba akordu no rekizitu hotu.
Aleinde ne’e, Angelino Moises haktuir durante asume kna’ar nu’udár xefe suku iha Fatulia sempre foti desizaun bazeia ba reuniaun konsellu suku.
Iha suku ne’e, eziste pesoál apoiu suku na’in-haat ne’ebé hala’o kna’ar tuir responsabilidade hanesan sekretáriu suku, asuntu finansa, asuntu sosiál no asuntu administrasaun.
Entretantu, Suku Fatulia hamutuk aldeia haat kompostu Bahadato, Osso-uaque, Uatulia-ana no Uai-to-bono ho totál populasaun 2.721 husi uma-kain 688.
Jornalista: Natalino Belo
Editór: Xisto Freitas da Piedade
