BOBONARU, 07 Outubru 2025 (TATOLI)-Xefe suku Manapa, postu administrativu Kailaku, munisípiu Bobonaru, Zeferino Loco Berre, preokupa ho projetu emerjénsia ba instalasaun gabiaun pakote ida iha mota Bulobu ne’ebé paradu dezde fulan Juñu no ezekuta husi empreza Talo Maubuti Unip. Lda.
Projetu konstrusaun gabiaun ne’e ho objetivu atu sátan bee-mota labele afeta ba komunidade nia hela fatin no ekipamentu públiku, liuliu iha tempu udan.
Autoridade lokál ne’e dehan empreza sobu tiha ona, maibé agora abandona hela obra, nune’e komunidade sira lamenta, tanba besik tempu udan sei afeta ba uma-kain 57, estrada diresaun Maliana-Kailáku, ai-riin eletrisidade no sede aldeia Tapomeak.
“Bainhira obra ne’e kontinua paradu, tempu udan [mai sei hamosu] dezastre naturál”, nia hateten ba jornalista sira, ohin.
Tuir informasaun, projetu ne’e paradu tanba hetan impedimentu husi kompañia balun. “Osan Governu aprova ona ne’e tenke ezekuta, se la’e hola medida bele entrega ba kompaña seluk ezekuta”, nia afirma.
Parte autoridade lokál hato’o ona karta ba Ministériu Obra Públika (MOP) iha Bobonaru atu buka meiu hodi kontinua obra ne’e.
Koordenadór Infaestrutura MOP, munisípiu Bobonaru, Fernando de Fátima, konfirma katak projetu referidu paradu tanba problema internál empreza nian. Hodi salienta katak antes ne’e fó ona karta xamada atensaun dahuluk ba kompaña tanba atividade paradu.
“Projetu ne’e uluk halo tiha ona, nia fíziku atinje 43,95%. Iha 2025 ne’e, sira hetan kontratu husi Governu komesa halo ona serbisu, Governu halo pagamentu dahuluk 40%, nune’e kompañia bele aselera serbisu. Depoizde ida-ne’e laiha ona atividade, maski sira halo ona eskavasaun balun iha ne’ebá”, nia relata.
Daudaun MOP prepara atu fó karta xamada atensaun daruak ba empreza atu kontinua obra ne’e, tanba xamada dahuluk la hetan reasaun.
Laiha nafatin atividade, ami sei prodús karta ida ba iha diresaun no gabinete unidade nian iha nasionál atu foti desizaun”, adianta.
Lembra katak obra ne’e hahú iha loron 16 Maiu 2025 no gasta orsamentu $532.503,81, kona-ba data remata la deskreve iha kuadru projetu.
Notísia relevante: Empreza Lesuburo garante finaliza konstrusaun gabiaun iha mota Bulobu tuir kontratu
Jornalista: Sergio da Cruz
Editora: Maria Auxiliadora
