DILI, 07 Outubru 2025 (TATOLI) – Institutu Kualidade Timor-Leste, Institutu Públiku (IQTL, I.P) atribui Sertifikadu Análize (CoA, sigla inglés) ba empreza rua ne’ebé halo produsaun ba produtu orijinál husi Timor-Leste atu kompete iha merkadu internasionál.
CoA maka dokumentu ida ne’ebé fó sai husi fabrikante ka laboratóriu teste nian ne’ebé verifika katak produtu ida prienxe kualidade espesífika, seguransa, no padraun regulatória sira liuhusi detallu rezultadu teste nian hasoru espesifikasaun sira ne’ebé estabelese ona.
Vogál III iha Departamentu Kualifikasaun Asuntu Internasionál IQTL, Tolentino Guterres, esplika katak CoA hanesan dokumentu importante ida ne’ebé verifika katak produtu ida liu ona teste no prienxe padraun kualidade ne’ebé estabelese ona.
“Dokumentu ida-ne’e fornese transparénsia no konfiabilidade kona-ba kumprimentu produtu nian ho regulamentu”, Tolentino Guterres dehan ba Tatoli, ohin.
Sertifikadu Análize ne’e IQTL lansa ona iha fulan kotuk hodi sertifikadu produtu neen husi empreza Horucene Unipessoál Lda. no Jocafesso Unipessoal Lda. mak hanesan Saos Saboreal Tomate, Saos Saboreal Aimanas, Dishwas, Handsoap Menthol, Handsoap Jasmine no Jocafasso Coffe.
Produtu neen ne’ebé IQTL fó sertifikadu ne’e hafoin halo teste iha laboratóriu Sucofindo Indonézia no PT. Seraswanti Indo Genetech (SIG).
Hafoin sertifikadu, empreza rua hahú fa’an ona sira-nia produtu iha rai-laran, inklui mós rai-li’ur hanesan kafé uut esporta ona ba Singapura.
“Ida-ne’e hatudu pozitu tebes no ba oin ita kontuinua fó sertifikadu ba produtu sira ne’ebé ita-nia setór privadu sira prodús atu fa’an no fasilita lori bá halo teste iha laboratóriu sira ne’ebé Governu halo ona parseria hanesan husi Indonézia”, realsa.
Nia esplika objetivu sira husi CoA mak hanesan garanti kualidade, katak oinsá atu asegura katak produtu ne’e prienxe padraun kualidade ne’ebé estabelese ona no prienxe nesesidade kliente nian.
Identifikasaun Produtu katak, serve hanesan dokumentu identifikasaun ne’ebé fornese informasaun detalla kona-ba komponente produtu kualidade.
Produtu Benchmarking katak, permite kliente sira atu kompara produtu ne’ebé simu hasoru padraun sira ne’ebé estabelese ona, nune’e garante katak produtu ne’e prienxe kritériu sira ne’ebé presiza.
Konformidade Regulatória katak, garante produtu ne’e kumpre ho regulamentu no padraun sira ne’ebé aplikavel, tantu nasionál komu internasionál.
Konfiansa Kliente nian katak, hasa’e konfiansa kliente liuhusi fornese transparénsia kona-ba kualidade no seguransa produtu nian.
Notísia relevante: Funsionamentu laboratóriu kalibrasaun IQTL hein aprovasaun Lei Taxa nian
Jornalista: Arminda Fonseca
Editora: Maria Auxiliadora
