KOVALIMA ,07 Outobru 2025 (TATOLI)- Servisu Munsipál Asaun Sosiál (SMAS), iha trimestrál datoluk ne’e, gasta ona osan hamutuk $8,350 hodi sosa kaixaun fó apoia ba família matebian vulneravél sira iha munisípiu Kovalima.
“Hahú fulan-Jullu to’o Setembru, atende ona pedidu ne’ebé submete ba Asaun Sosiál hodi fó apoia kaixaun hamutuk 58, nune’e ita gasta ona osan hamutuk $8,350 hodi fó apoiu a família vulneravél sira ”, Diretór Servisu Munisipál Asaun Sosiál (SMAS),Clementino Bere, relata ba TATOLI iha nia servisu fatin Bairru-Costa, Suai, ohin.
Dirijente ne’e esplika SMAS halo kooperasaun ho empreza Raius Camenasa hahú 2022 to’o ohin loron hodi fornese kaixaun bainhira simu pedidu husi xefe suku sir husi postu Suai,Zumalai, Fatumea no Fatululik ladun barak tanba haree ba kondisaun estrada.
Kaixaun 58 ne’ebé apoia ona ho nia medida ki’ik hamutuk 11, ho nia folin kada kaixaun hamutuk $60.00 ne’ebé gasta ona osan $660.00, kaixaun ho medida naton ha’at ho nia folin kada kaixaun $95.00 ne’ebé gasta ona osan $380.00 no kaixaun ho medida boot ne’ebé kada kaixaun ho folin $170.00 hamutuk 43 ne’ebé gasta ona osan $7.310.00
Orsamentu Jerál Estadu (OJE) 2025 aloka ba Servisu Munisipál Asaun Sosiál (SMAS) atu sosa kaixaun hamutuk $50.000,00 husi orsamentu ne’e gasta osan hamutuk $36.790,00 no balansu sei iha $28.440,00
Jornalista:Celestina Teles
Editór:Florencio Miranda Ximenes
