BOBONARU, 08 Outubru 2025 (TATOLI) – Tékniku Ministériu Obra Públika (MOP) Bobonaru deteta katak projetu konstrusaun muru protesaun pakote I iha mota Nunura ne’ebé lokaliza iha aldeia Manu-Aman, suku Tapo-Memu, postu administrativu Maliana, munisípiu Bobonaru, paradu tanba empreza Zhencia Unip. Lda. abandona tiha serbisu.
Koordenadór Infraestrutura MOP Bobonaru, Fernando de Fátima, dehan projetu ho tipu emerjénsia ne’e ho metru 220 no implementa dezde tinan 2024, maibé nia progresu fíziku foin atinje 16,41%.
Tanba ne’e, MOP Bobonaru hato’o ona karta atu ba MOP nasionál hapara kontratu ho empreza Zhencia. “Ami fó ona karta xamada dala-tolu, depo’is fó tan karta ikus, tanba projetu ne’e paradu. Ita fó karta xamada dala-rua to’o tolu tanba momentu ne’ebá nia la halo serbisu, entaun estraga fali konstrusaun ne’ebé ita halo tiha. Ita tenke hasai karta ikus ba nasionál, más atu hapara ou lae filafali ba sentrál mak foti desizaun”, nia dehan ba jornalista sira.
Ba kestaun ne’e, jornalista tenta halo konfirmasaun ho na’in ba empreza Zhencia Unip. Lda., Luís Mausoco Caero, maibé rejeita fó komentariu no duni tan jornalista sira. “Bá tiha dook husi ne’e, ha’u lakohi fó komentáriu”, Mausoco hateten ho lian-si’ak no hatudu liman.
Antes ne’e, iha loron 23 Setembru, iha entrevista ho jornalista sira, na’in ba empreza rekoñese katak projetu la’o tarde tanba kondisaun klima no problema seluk mak mákina avaria.
“Durante ne’e serbisu la’o normál hela, soké ami-nia mixer mak aat, más mekániku iha ona dalan mai para sobu lori bá Dili troka tiha. Agora, ha’u aluga fali Risky nia mai para cor fali no atinje ona 30% liu. Semana ida ami cor tan ne’e pertajen sa’e, tanba ami hetan estensaun to’o Dezembru ne’e bele hotu”, Luís Caero hateten foin lalais ne’e.
Tuir observasaun jornalista Tatoli iha terrenu, mákina pezada hanesan eskavadór ida no karreta mixer ida para iha fatin obra la’o, maibé la halo operasaun.
Projetu ne’ebé Zhencia Unip. Lda. responsabiliza ho kustu rihun $300-resin.
Notísia relevante: Komunidade lamenta ho projetu konstrusaun muru ponte Nunura ne’ebé la’o atraza
Jornalista: Sergio da Cruz
Editora: Maria Auxiliadora
