DILI, 08 Outubru 2025 (TATOLI)-Komisaun B iha Parlamentu Nasionál trata Asuntu Negósiu Estranjeiru, Defeza no Seguransa, solisita ba autoridade kompetente atu prosesa sidadaun sira ne’ebé hala’o atividade negósiu kontrabandu, liuliu iha liña fronteira.
“Se sidadaun ida halo negósiu ilegál, hakarak ka lakohi autoridade seguransa tenke halo apreensaun no prosesa tuir lei ne’ebé vigora iha ita-nia rai”, Prezidente Komisaun B, Domingos Augusto ‘Deker’, hato’o iha Parlamentu, ohin.
Hodi rekomenda ba Ministéiru Interiór (MI) no Komandu Jerál Polísia Nasionál Timor-Leste (PNTL) atu aumenta númeru efetivu Unidade Polísia Fronteira (UPF), nune’e kontrola di’ak liután iha liña fronteira, tanba tuir fiskalizasaun sei falta rekursu umanu.
Lembra katak Komandu PNTL Kovalima halo apreensaun ba sigarru ilísitu kaixa 389. Apreensaun ne’e halo bainhira iha loron 06 setembru, iha tuku 02h00 madrugada, halo pasa revista iha área Salele, Tasi Kasabsuk, hodi identifika katak movimentu ne’ebé deskonfia halo tranzasaun ilegál.
Nune’e bazeia ba informasaun ne’ebé rekolla iha terrenu, identifika katak iha fatin ne’e ema xinés ida importa sasán illegal ho ró boot, depois sasán sira ne’e transfere ba ró ki’ik hodi transporta ba tasi ibun.
Husi bero hirak-ne’e mak Komandu PNTL Kovalima deteta sigarru hamutuk kaixa 388, bero haat, karreta ida, nune’e PNTL momentu ne’ebá halo kedas apreensaun ba sasán sira hirak-ne’e, maibé suspeitu sira ne’ebé hatama sasán kontrabandu sira ne’e mak polísia la halo identifikasaun tanba halai lakon.
Diretór Servisu Investigasaun Kriminál (DSIK) Nasionál, Superintendente Polísia João Belo dos Reis, informa kazu ne’e agora iha hela prosesu investigasaun.
Notísia relevante: PNTL Kovalima halo apreensaun sigarru ilegál kaisa 389
Jornalista: Nelson de Sousa
Editora: Maria Auxiliadora
