DILI, 09 Outobru 2025 (TATOLI)—Ministru Transporte no Komunikasaun (MTK), Miguel Gonçalves Manetelu, hateten aviaun Zona Espesiál Ekonómia Sosiál Merkadu (ZEESM) sei labele kontinua nia operasaun enkuantu seidauk iha dokumentu ofisiál no la halo rejistu iha Autoridade Aviasaun Sivíl Timor-Leste (AACTL, sigla portugés).
Notísia Relevante: Autoridade RAEOA planeia atu reativa operasaun aviaun ZEEMS
“Aviaun ZEEMS ne’e imi ba haree to’ok ninia kondisaun ne’e di’ak hela ka lae. Aviaun ne’e la rejistu halo nusa mak nia bele semo,” Ministru Manetelu informa ba Agência Tatoli, hafoin ramata reuniaun Konsellu Ministru iha Palásiu Governu, Kuarte ne’e.
Governante ne’e hateten, aviaun ne’e labele semo tamba seidauk rejistadu no se bainhira sira iha dokumentu kona-ba aviaun ne’e, entaun sira tenke lori mai atu ministériu relevante bele halo rejistu.
Aleinde ne’e, nia hatutan, aviaun ne’e ninia kondisaun mós aat hela no sé mak hateten aviaun ne’e bele semo, imi ba haree policeline ne’e ema hasa’i tiha ona ka la’e, tanba uluk ne’e ema dada haleu policeline ne’e signifika katak aviaun ne’e iha problema.
“Entaun sira tenke hamoris ka hadi’a fali dokumentu legál aviaun nian ho Autoridade Air Trnasport Canadá no mós AACTL, hafoin loos ona mak sira bele hetan permisaun voo husi AACTL hodi halo operasaun hanesan uluk,” nia esplika.
Enkuantu, aviau ZEESM mós labele halo operasaun voo ba nasaun seluk tanba aviaun ne’e sei uza hela kódigu (CofR) ka rejistrasaun Canadá nian, nune’e aviaun refere sei semo de’it iha Timor-Leste no labele halo voo komersiál ba nasaun seluk.
Maibé, nia dehan, se hakarak expanda tan ninia voo tenke rejista uluk iha AACTL hodi hetan xapa matríkula (Plat) 4W no tenke mós hetan atestadu médiku (CofA).
Notísia Relevante: PM Xanana deside halo auditória internasionál ba ró Haksolok-aviaun ZEESM
Jornalista : Alexandra da Costa
Editór : Cancio Ximenes
