MJ no ADN koordena halo dezeñu ba edifísiu Sentru Juveníl
DILI, 09 Outubru 2025 (TATOLI)—Ministériu Justisa (MJ) no Ajénsia Dezenvolvimentu Nasionál (ADN) hahú dezeñu ona edifísiu Sentru Juveníl iha Tibar.
Ministru Justisa, Sergio Hornai hatete, rai ba instalasaun Sentru Juveníl identifikadu ona no parte MJ enkamiña ona dokumentu ba Ministériu Planeamentu Investimentu Estratejiku (MPIE) liuhusi ADN hodi husu hahú dezeña.
“Sentru Juveníl iha faze ADN. Sira bele halo ona dezeñu ba projetu ne’e. Portantu ha’u hakarak hateten ongoin hela no projetu ne’e la’o daudaun hela,” Ministru Sergio informa ba Jornalista sira iha salaun MJ, Kolmera, Kinta ne’e.
Notísia relevante : Ekipa téknika interministeriál sei diskute rai ba instalasaun Sentru Juvenil Tibar
Orasamentu ba dezeñu edifísiu Sentru Juveníl ne’e hamutuk $200.000.
Ministru rekoñese, planu ba instalasaun la’o kleur tanba iha situasaun administrativamente balun tenke priense.
“Projetu ne’e halo ho osan boot oituan, entaun ita presiza iha koodenasaun di’ak ho nune’e Diretór Jerál Polítika Justisa, liuliu iha Diresaun Servisu Prizionál bele halo serbisu no ha’u rasik haruka ona dokumentu ba MPIE liuhusi ADN atu haree buat balun, hodi nunee bele fó kontinuidade,” nia akresenta.
Ministru dehan, bainhira dezeñu halo hotu ona maka konstrusaun bele realiza iha tinan ne’e ou tinan oin.
“Termu referénsia no BoQ ne’e la’ós ha’u mak halo mesak, ha’u husu tulun ba iha ADN hanesan instituisaun Estadu atubele providénsia ba ita,” nia katak.
Jornalista : Natalino Costa
Editora : Julia Chatarina
