DILI, 08 Outubru 2025 (TATOLI)—Ministériu Justisa (MJ) hamutuk ho organizasaun Internasionál Migrasaun (IOM, sigla inglés), Kinta ne’e, halo lansamentu ba website Komisaun Luta Anti-Tráfiku Umanu (KLATU) https://www.mj.gov.tl/?q=node/1974 hodi reforsa serbisu liuhusi divulgasaun informasaun nune’e bele kombate krime tráfiku umanu iha Timor-Leste.
Ministru Justisa, Sergio Hornai hateten, inisiativa ne’e nu’udar Governu nia kompromisu liuhusi ninia programa atu hakbiit instituisaun Estadu liuliu ba polítika dijitalizasaun nian.
“Lansamentu ohin hanesan kompromisu Governu depoizde komisaun ne’e estabelese, sira tenta haree katak dijitalizasaun ne’e hanesan forma ka jestu ida atubele introdús sira-nia hanoin hotu iha sistema ida-ne’e, liuliu desizaun ne’ebé Estadu foti komisaun ne’e bele tau iha website hodi nune’e komunidade bele akompaña no hato’o sira-nia hanoin ruma ba serbisu ne’ebé komisaun tráfiku umanu halo ona,” Ministru Sergio hateten ba Jornalista sira hafoin halo lansamentu website, iha MJ.
Notísia relevante : PNTL detein bangladeza na’in-rua suspeitadu envolve krime tráfiku umanu
Entidade ne’ebé hola parte iha KLATU mak hanesan MJ, Polísia Sientífika no Investigasaun Kriminál (PCIC), Diresaun Nasionál Servisu Investigasaun Kriminál, Servisu Migrasaun, Ministériu Públiku no Sosiedade Sivil.
Website ne’e sei fasilita liután Komisaun ne’e hodi bele divulga informasaun sira ba komunidade, liuliu ba prevensaun krime tráfiku umanu.
“Liuhusi website ne’e, sira (komunidade) bele iha kontaktu ho Komisaun kona-ba irregularidade ne’ebé mak mosu nune’e entidade investigasaun kriminál bele halo nia serbisu kombate aktu ida-ne’e,” nia akresenta.
Governante ne’e dehan, durante ne’e KLATU ne’ebé tutela ba MJ halo ona sosializasaun ba aldeia, suku, postu to’o munisípiu hodi sosializa informasaun kona-ba prevene krime tráfiku umanu iha Timor-Leste.
Tuir Ministru Justisa, krime tráfiku umanu hanesan krime ne’ebé laiha ona fronteira, nune’e ho estabelesimentu webiste ne’e bele tulun Komisaun halo nia serbisu ho di’ak.
“Husu ba entidade hotu iha Timor-Leste, karik mosu krime tráfiku umanu iha territóriu nasionál ka fora husi juridisaun Timor-Leste, ita bele hamutuk preve krime ne’e,” Ministru Hornai fó hanoin.
Iha sorin seluk, Diretór Servisu Investigasaun Kriminál, Vicente Fernades e Brito hateten, lansamentu website ida-ne’e hatudu katak Governu iha seriadade no kompromisu forte atu kombate krime tráfiku umanu iha Timor-Leste.
Jornalista : Natalino Costa
Editora : Julia Chatarina
