DILI, 10 Outubru 2025 (TATOLI)—Prezidente Repúblika, José Ramos-Horta, hamutuk ho Governu no Federasaun Atletizmu Timor-Leste (FATL) lansa expo Dili Internasionál Maratona iha Palásiu Prezidensiál Nicolau Lobato, Bairru Pite, Dili.
Notísia Relevante: Dili Internasionál Maratona “Halai ba Palestina” atu promove pás
Prezidente Repúblika, José Ramos-Horta, hateten eventu ne’e importante ba Timor-Leste hodi fó solidaridade ba vítima barak ne’ebé hasoru hela violasaun direitu umanu.
“Ita eleva hela Dili Internasionál Maratona husi eventu desportivu loron-ida (1) nian ba selebrasaun loron barak nian ba ita-nia nasaun nia espíritu. Dili Internasionál Maratona ho expo ne’e permite ita atu simu mundu la’ós de’it ba ita-nia rota halai nian ne’ebé furak, maibé mós ba ita-nia kultura riku, ita-nia hahán gostu, ita-nia ospitalidade ne’ebé di’ak ne’e hotu promove mensajen solidariedade internasionál nian,” Ramos-Horta hateten.
Dili Internasionál Maratona hala’o durante loron tolu hahú 09-11 fulan-Outubru, iha faza da-huluk nian mak lansamentu ba expo ne’ebé tau mós ho hahan tradisionál no hahan sira husi nasaun membru ASEAN nian, mo iha mós konsertu múzika iha resintu Palásiu Prezidensiál no ikus liu iha loron 11 Outubru mak iha kurida ne’ebé ho tema prinsipál ‘Halai ba Palestina’.
Tuir mensajen sentrál “Halai ba Palestina” Halai ba Pás no Solidariedade, Dili Internasionál Maratona expo 2025 nia objetivu mak atu selebra no fahe identidade úniku Timor-Leste nian hodi hametin ligasaun rejionál no internasionál sira, partikularmente iha komunidade ASEAN no CPLP.
Dili Internasionál Maratona expo 2025 dezeña atu alkansa objetivu prinsipál oioin, promove identidade kulturál no gastronómika timoroan nian, estimula turizmu liuhosi feira, espetákulu, no espozisaun sira, kria oportunidade rendimentu ba artezanatu lokál sira, produtór sira, no restaurante sira no reforsa maratona nia valór prinsipál sira kona-ba pás no solidariedade.
Destake sira husi Dili Internasionál Maratona expo 2025
Expo ne’e hala’o husi tuku 18h15 to’o 22h00 loro-loron iha loron 09-10 fulan-Outubru, ho atividade sira-ne’ebé prolongada iha loron tomak iha loron 11 Outubru.
Feira Gastronomia Nasionál no Internasionál, Viajen kulinária ida-ne’ebé hatudu sabor timoroan sira no hahán internasionál sira husi nasaun sira ASEAN no CPLP nian ne’ebé partisipa, inklui mostra espesiál “Hamutuk Te’in ba Pás”.
Feira Artezanatu no Produtu Lokál, Espozisaun no fa’an artezanatu auténtiku Timor nian, textil tais, no produtu lokál, hodi fó plataforma ba artezanatu no kooperativa lokál sira.
Aprezentasaun Kulturál Dinámiku, Programa palku ho klase mundiál ho dansa tradisionál sira husi Timor-Leste no grupu internasionál sira, múzika direta husi artista lokál no nasionál sira, no atuasaun espesiál sira.
Espozisaun Interativu no espasu sira, área sira expo nian ne’ebé dedika ba saúde, desportu, nutrisaun, arte, no kultura, hamutuk ho área labarik nian no jogu tradisionál sira.
Destake sira ba Programa Divertimentu nian
Loron 09 fulan-Outubru, abertura ofisiál no apresentasaun Timor-Indonézia. Serimónia abertura ne’e prezide direita husi Prezidente Repúblika José Ramos-Horta. Iha kalan ne’e inklui mostra “Hamutuk Te’in ba Pás” ho Timor-Leste no Indonézia, tuir fali ho dansa tradisionál sira hosi Kuba, Malázia, no atuasaun husi Artista Nasionál Solo Anty no Any.
Loron 10 fulan-Outubru, Kalan Kulturál Angola no Japaun. Loron daruak destaka ba mostra “Hamutuk Te’in ba Pás” ho Angola no Japaun, hamutuk ho atuasaun vibrante sira inklui Capoeira, Grupu Dança no Múzika UCT, no múzika husi banda hanesan Vidigal Pinto no Klamar.
Loron 11 fulan-Outubru, loron Maratona no enserramentu bo’ot, hahú dader tuku 06h00 Eventu prinsipál sira Dili Internasionál Maratona nian hahú, ho modalidade korrida haat (4) (42km, 21km, 10km, no 3km).
Loron ne’e, kontinua ho jináziu bisikleta nian, jogu tradisionál sira ba idade hotu-hotu, no Feira Gastronomia no Artezanatu nian ne’ebé la’o hela.
Kalan husi tuku 17h00 Grande Serimónia Prémiu no Eventu Enseramentu sei iha diskursu husi ofisiál Governu altu sira, serimónia medalla ofisiál ba vensedór maratona sira, Desfile Moda Timorense ida-ne’ebé promove tais orijinál, no atuasaun muzikál ne’ebé poderozu husi Orkestra Kámara Harmonia, Abito Gama, no seluk tan.
Dili Internasionál Maratona expo 2025, hein atu atrai audiénsia oioin husi atleta nasionál no internasionál sira, públiku timoroan, reprezentante sira husi nasaun sira ASEAN no CPLP nian, turista no komunidade.
Jornalista : Hortencio Sanchez
Editór : Cancio Ximenes
