Sekretáriu Estadu Expedito husu mídia-na’in prioriza kualidade produtu jornalístiku
DILI, 09 Outubru 2025 (TATOLI)—Sekretáriu Estadu Komunikasaun Sosiál, Expedito Loro Dias Ximenes konvoka enkontru ho dirijente mídia nasionál iha ámbitu motiva atu tau prioridade ba kualidade produtu jornalístiku.
Governante ne’e konsidera, mídia konvensionál no dijitál nudar pilár ba demokrásia no pilár importante ba unidade nasionál.
“Enkontru ohin ne’e nu’udar enkontru trimestrál ne’ebé ha’u halo ho Xefe Redasaun, Diretór Informasaun no Editór seniór hodi ko’alia kona-ba serbisu sira ne’ebé mídia halo. Ohin ha’u husu ba sira oinsá nafatin kontinua fó prioridade ba kualidade produtu jornalístiku,” Sekretáriu Estadu Expedito hateten ba jornalista sira hafoin enkontru iha Palásiu Governu, Kinta ne’e.
Notísia relevante : Hili membru foun CITL: respeita ema nia kapasidade no hadi’a kualidade imprensa
Governante ne’e liuhusi reuniaun, fó hanoin ba mídia-na’in sira atu hatene di’ak liután programa no Orsamentu Jerál Estadu (OJE) 2026 ne’ebé Governu aprezenta ona ba Parlamentu nune’e bele rekolla informasaun ho di’ak.
Fó hanoin mós ba kobertura ba adezaun Timor-Leste nian ba Asosiasaun Nasaun Sudeste Aziátiku (ASEAN, sigla inglés) no Komemorasaun tinan 50 Balibo Five.
Mídia-na’in sira durante enkontru propoin ba Governu atu aposta ba formasaun ba jornalista sira.
“Ohin ha’u mós hateten ba sira, kona-ba formasaun Governu prevee ona $200.000 iha Konsellu Imprensa (KI) atu tau ba formasaun ba jornalista sira,” nia katak.
Nune’e, Sekretaria Estadu Komunikasaun Sosiál (SEKOMS) sei komunika ho KI kona-ba mekanizmu fó formasaun ba jornalista.
“Atu nune’e formasaun sira ne’e labele hanesan formasaun ho seminár de’it, maibé tenke ho formasaun, nune’e hasa’e koñesimentu jornalista hodi garante kualidade,” nia tenik.
Mídia-na’in sira mós propoin, ba oin karik atu fó apoiu ruma labele liu asosiasaun jornalista sira maibé bele direitamente ba mídia sira.
Nune’e SEKOMS sei diskute iha trimestre datoluk tinan ne’e kona-ba kestaun apoiu ba mídia.
Jornalista : Natalino Costa
Editora : Julia Chatarina
