OEKUSI, 13 Outubru 2025 (TATOLI) – Prezidente Autoridade Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, segunda ohin, promete katak iha tempu-badak sei muda konstrusaun ne’ebé empreza estranjeiru ida konstrui besik monumentu Lifau tanba futuru sei estraga imajen fatin sagradu ne’e.
Ezekutivu fó-sai desizaun ne’e, atu responde preokupasaun no ejizénsia husi igreja Katólika no povu Timor-Leste nian, tanba portaun bo’ot Lifau nu’udar sivilizasaun povu Timor-Leste nian.
“Ita komprende, obrigasaun nesesidade konjuntura dezenvolvimentu institusionál integrada, maibé ho razaun rasionalidade rua, ne’ebé ha’u pronúnsia iha konferénsia imprensa ne’e, nu’udar polítika obrigasaun morál Autoridade RAEOA atu respeita ejizénsia husi igreja no ejizénsia husi povu Oekusi katak tenke muda tanba fatin ne’e sagradu, nu’udar sivilizasaun ba povu Timor-Leste. Entaun, ita hotu tenke aseita no tenke muda iha tempu-badak,” nia hateten, liuhusi konferénsia imprensa iha Oekusi, ohin.
Notísia relevante:Pe. Carlos husu Autoridade RAEOA muda otél ne’ebé harii besik monumentu Lifau
Tuir líder másimu RAEOA ne’e katak ho planu no inísiu projetu “Centro interpretativa de histórico Lifau” ne’ebé deklaradu tiha ona – respeita no tane nafatin aspeitu no valór multidimensionalidade husi “Eno Naek ma Nesu Naek Lifau” ka odamatan bo’ot Lifau, haree mós aspetu institusionál ligadu ba operasionalidade funsionamentu ekonómiku Airoportu Rota do Sândalo, obra ne’e ho objetivu ida, maibé harii besik kedan iha aredór monumentu Lifau.
“Entaun ha’u deklara katak, ita sei muda ba fatin seluk hahú kedan depois konferénsia ida-ne’e, labele harii otel besikliu aeroportu, no fatin ne’e sagradu ba povu Timór, maibé otel ne’e sei okupa espasu poténsia ba alargamentu miniatura interpretativa istóriku importante ba ita-nia rai no povu Timór,” nia promete.
Notísia relevante:Konstrusaun otél besik monumentu Lifau, Dom Virgílio: “Ita preokupa uitoan”
Antes ne’e, Amo Vigario Foranho Vigararia Oekusi, Atuál Padre Paroko Nossa Senhora do Rosário Numbei, Carlos de Deus, rekomenda ba Autoridade RAEOA ho Koordenadór ZEEDOA, hodi muda konstrusaun otél ne’ebé empreza estranjeiru ida konstrui besik iha monumentu Lifau tanba futuru sei estraga imajen fatin sagradu ne’e.
Notísia relevante:FOTO ATUÁL: Empreza Haichuan ´harahun´ semitériu antigu 13 iha portaun bo’ot Lifau
Entretantu, lembra katak, antes ne’e, Prezidente Autoridade RAEOA, Rogério Tiago Lobato, informa, projetu otél Lifau hahú konstrusaun konstrui otél ho kuartu 50, ne’ebé konstrui husi investór internasionál husi Malázia, no selebra ona kontratu arrendamentu ho Autoridade RAEOA kada fulan empreza kontribui $5000 ba kofre Estadu ho durasaun kontratu durante tinan-30.
Jornalista: Abílio Elo Nini
Editór: Rafael Ximenes de A. Belo
